Ël piemontèis an Argentin-a

La ròba pi dròla che un a peul pensé, a l'é capitame ant l'Argentin-a profonda: i son trovame a fé na conferensa al Teatro dla Comun-a ëd San Francisco 'd Cordoba, tuta e mach an lenga piemontèisa. Mersì al «Master in Cultura e patrimonio storico-linguistico dël Piemonte për la formazione degli insegnanti», masentà da la profesorëssa Alda Rossebastiano dl'Università 'd Turin, i son tornà për la sconda vòta an Argentin-a, dòp l'esperiensa ch'a l'ha pròpe fiatame 'l cheur e la ment ëd Cordoba dël 2006. St'an sì 'l Master as tenìa a San Francisco, ant ël cheur dla Pampa gringa. L'intrada an sità a l'é marcà dal Monument Nassional a j'Emigrant Piemontèis, e da na Mòle, cita e grassiosa, sede dla Familia Piemontesa dë San Francisco. Già ant ël viage travers la Pampa, a m'arciamava lese ij nòm sle boteghe dij paisòt che s'ancrosiavo; e rivand an sità le prime ansëgne am fasìo sente come se dòp avèj traversà l'Oceano, stassionà an j'aeropòrt ëd Madrid, ëd Santiago dël Cile, 'd Cordoba, i fussa tornà coma për n'incantament da nòste bande. Mach l'architetura, bassa e bianca, a l'era 'n pòch forestera. Dëdnas a l'obergi ij prim nòm dle giojere ch'i vëddo a arson-o familiar : Ajassa, Barbero, Bosio, Piana, Losano, Giuliano. Face, paròle, pensé dij nòste, a doi di 'd viage an avion da sì. Peui l'ancontr con j'ëscritt al Master : Filippa, Cambursano, Olivero, Bocca, Callieri, Mina; e Graziano Lardone che a San Francisco as da da fé për tuti ij rapòrt con la Region Piemont. A mi a tocava parlé 'd lenga e literatura piemontèisa, dòp tanti docent che dal 2007 a l'han fàit soe lession su vàire materie amportante. La veuja 'd savèj 'd conòsse nen mach la stòria, la geografia, l'economìa dël Piemont, ma cola coltura che a l'avìo goernà con dë s-cianch ëd paròle amprendù dai sò, e che adess a piavo forma, significà, contnù, stòria, a l'ha fàit volé coma 'nt un seugn ij des di dël cors. d'Albina Malerba - dal Vënner ëd La Stampa dël 27 ëd giugn dël 2008

Indietro