Tute le poesie d'Alfredo Nicola

Grassie a la dedission e a la siensa 'd Dario Pasero, Alfredo Nicola (Alfredino) a peul gòde 'd n'edission fiamenga 'd tute le «Poesie» (doi volum, pp. 774, euro 25 ) pen-a surtija da la Ca dë Studi Piemontèis e La Slòira, con n'achit d'Albina Malerba (novità dl' edission a l'é che Pasero a da a le stampe un lìber preparà da Alfredino, ma mai publicà, «Spers», e 'dcò le «Poesie sparse» publicà an sa e an là). A ses agn dal sentenari dla nassita, Alfredino a l'ha donca n'edission ch'a merita. Colòna dij Brandé, testimòni d'un temp ch'a l'ha cudì nen mach për nostalgìa, òm ëd passion për la mùsica, la poesìa, la literatura piemontèisa, ch'a l'ha contribuì për soa part a dèsgagé - con Pacòt, Olivero, Galin-a e tanti d'àutri - dal mufì 'd na vision provincial, soa creatura pì bela a l'é stàita l'arvista trimestral «Musicalbrandé», na creoiera dë studi musicaj, stòrich, literari dël Pìemont antich e modern. Ma la soa ambission pì satìa a l'é stàita cola d'esse 'l poeta ch'a l'é stàit. Ij sò lìber ëd poesia, mai tròp gròss e sempe bin cudì a son stàit pòchi ma bon. Dal prim, «Penombre», ch'a l'é dël '29, a l'ùltim, «Cartolin-e», ch'a l'é dl'86, Alfredino a l'é stàit fedel a na misura finissima d'orija. A l'avìa ancaminà con quàich débit crepuscolar (specialment «Penombre»), ma a l'ha continuà dël sò fasend pì che tut parlé vos e son (d'andrinta). La forma pì soa a l'é 'l sonèt (bastrìa arcordé 'l lìber miraco pì bel, «Samada»): na gàbia metrica che Alfredino a trata coma na cita sala d'incision. La paròla a ciapa d'arsonanse speciaj, ch'a son anlevasse a la lession ëd magìster e d'amis come Pacòt e Olivero, ma che 'n chiel a l'han pijà 'd noanse motobin satije dë squisì. La mùsica an chiel a ven sempe (ma a lo disìa già Nino Costa) da «n'orchestrassion perfeta». Ma a l'é 'n pòch coma se Alfredino a fùissa passà da 'n gieugh d'imitassion a 'n moviment sempre pì interior. Na stra che costa edission a ven a confermé. ëd Giovanni Tesio - dal Vënner ëd La Stampa dël 20 ëd giugn dël 2008

Indietro