La Festa dël Piemont ch'a fa 41 e ij cit

La Festa dël Piemont ch'a fa 41 a l'ha daje 'd bel andi a nòste tradission dimostrand ch'a-i son tanti giovo ch'a travajo e che a l'han a cheur la lenga piemontèisa: a son rivà a Cherasch ansema a studios dij pì avosà ant ël mond dle neuve tecnologìe ch'a podran giuté le lenghe pì cite fin-a da l'Ucraina coma Berto 'd Sèra o dal Kasakistan, coma Fabrissi Vielmin, a testimonié 'l valor dël Piemontèis lenga dël cheur. Donca a l'é a l'avnì ch'i dovoma vardé e a l'é për l'avnì ch'a venta angagesse. E angagesse për l'avnì a veul dì penseje ai cit. E për ij cit e con ij cit, soagnà da l'Associassion «Amici della Cultura Piemontese» 'd Pianëssa e dl'Union ëd j'Associassion Piemontèise ant ël Mond, a l'é pen-a surtìe un volum, con Cd tacà ansema, d'Ezio Girardi, «Nane nanete, filastròcole, canson për le masnà e mùsiche dla tradission piemonteisa», con le canson cantà da j'anlev dla Scòla Elementar «G. Rodaci» 'd San Gili, classe I e V; e dla Scòla Media «B. Vittone» 'd Mathi, classe I B; arangiament e diression dël còro dël maestro Ezio Girardi. «L'idea - a scriv Censin Pich ant la presentassion - ëd cost cit ma pressios santilion ëd canson popolar piemontèise a nass dai cors ëd lenga piemontèisa organisà da la Ca dë Studi Piemontèis, mersì a l'agiut ëd la Region Piemont e conforma lë spìrit ëd la Compania dij Brandé», an sil pianà d'Alfredo Nicola, e a veul esse në strument didàtich për cissé travers ël cant l'amprendiment e la pràtica dël piemontèis da part dle masnà, dij giovo. Rita Giacomino, psicopedagogista, ch'a l'é un-a dle magistre angagià ant ij cors, ant la prefassion a testimonia coma ij cit a s'angagio tant volënté ant le canson piemontèise, che a l'han ëdcò 'l valor d'ambaroné cit ëd diverse part ch'a peulo dësmoresse tuti ansema e amprende. Un bel travaj ch'a sa samblé ansema 'l temp d'antan (ch'a l'é nen përdù) con ij di 'd doman. d'Albina Malerba - dal Vënner ëd La Stampa dël 13 ëd giugn dël 2008

Indietro