An arcòrd d'Elena Carasso

A son otant'agn da la nassita d'Elena Carasso, quìndes da la mòrt. Nà a Vërsèj dël '28, a Vërsèj a l'é mòrta a l'imprevista dël '93. Ma a l'ha lassà 'n veuid nen da pòch, përchè a l'é stàita na poetëssa ch'a l'ha savù lassé na trassa ant la poesìa vërslèisa, ma pì che tut ant la poesìa tut curt, sensa gnun-e determinassion (e chi a veubia lese la pì bela cujìa 'd soa poesia a basta felo travers ël lìber «Reusa Cocòn-a» publicà dël 2000 da la Ca dë Studi Piemontèis). D'àutra part o la poesìa a-i é o a-i é nen e a l'é nen custion dë scrive an lenga o an piemontèis. E tan për dì. Elena Carasso a l'ha scrivù an italian e an piemontèis. Ansi, prima an italian e mach après an piemontèis. Inùtil dì che le còse pì bele a l'ha scrivuje an piemontèis, ant sò vërslèis satì e genìch. I dirai 'd pì. I dirai che le soe poesie an piemontèis dël principe a surtijo nen da la media dle poesie ch'a capita 'd lese an sa e an là për le province piemontèise o 'dcò an sità quand a-i é cheidun ch'a s'ancamina a fé ij prim pass. Poesie - veuj dì - d'ocasion, ch'a canto soa sità, ch'a tiro chèich ròch, ch'a parodiso e ch'a la pijo larga (o magara fin-a garga). Ma peuj pì anans la qualità a mura, a s'àussa, a riva a fesse giusta. Elena Carasso a riva a ciamesse le cose pì përfonde, ch'a-j seurto da 'ndrinta, ch'a gico, ch'a posso, ch'a buto. Gnun-e certësse gnun-e gnògne (e se mai chèich foraton). A l'era pa përson-a da stërmesse le còse e a savija vardesse 'ndrinta. A l'avija patì da masnà e se sòn a veul nen dì ch'a fassa poesìa, a veul bin dì che un a mura në sgoard pì rich e pontù, pien dë noanse e 'd malinconìa. A otant'agn da la nassita am piass arcordé ij vers dla poesìa «Quand i morrò»: «Quand i morrò/ 'm piasrìa ch'a fùissa/ 'nti sa stansa/ color dal pòm mordù, 'n mes/ a si giargiàtoli bonpat, nossenti/ dal percome e dal parchè;/ podéj dabon sguijé/ dandji 'ncò n'ugiada a doi ritrat/ e a la ciapela piturà a limon». Vita e mòrt - come sempe - anlià. ëd Giovanni Tesio - dal Vënner ëd La Stampa dël 16 ëd magg dël 2008

Indietro