An memòria ëd Gianrens P. Clivi, a doi agn da la mòrt

«Quem tu probe meministi: l'amis, lë studios, che tuti a ricòrdo». A l'é 'l tìtol dle doe giornà dë studi e testimonianse an memòria 'd Gianrenzo P. Clivio, ch'a sarà arcordà, a doi ani da soa mòrt (Toronto, Canada 22 ëd gené 2006), ant la sala conferense dl'Archivi dë Stat ëd Turin (piassëtta Mollino 1, tacà al Teatro Regio an piassa Castel), vënner 15 ëd fervè, a parte da 4 e mesa dël dòp disné, e saba 16 tut ël di a parte da 9 e mesa dla matin. La stòria coltural dla lenga e dla literatura piemontèisa dj' ùltime quarant'ani a l'é sislà dai travaj 'd Clivio. Na a Turin ël 18 ëd gené dël 1942, Clivio a l'é laureasse ambelessì ant ël 1962. Catedràtich a Toronto, a l'ha mostà ant le Università d'Harvad, ëd Boston, dël Nord Carolina, a Heidelberg, e 'dcò an Calabria e a Napoli. A Turin, con Renzo Gandolfo e d'àutri amis e sò papà Amedeo, ant ël 1969 a l'ha fàit nasse 'l Centro Studi Piemontesi-Ca dë Studi Piemontèis e l'arvista semestral antërdisciplinar "Studi Piemontesi". A l'é stàit Diretor Sientìfich, ma 'dcò anima e regista, dij Rëscontr antërnassionaj dë studi, che minca ani a l'han portà an Piemont studios da tute le part dël mond per parlé 'd lenga e literatura piemontèisa. Soagnà da la Ca dë Studi Piemontèis, con la colaborassion dla Companìa dij Brandé, dla Slòira e l'agiut dla Region Piemont, ël Rëscontr a vedrà le relassion dj'amis e 'd colega 'd vàire Università italian-e e forëstere: Giuliano Gasca Queirazza, Censin Pich, Enrico Allasino, Sergio M. Gilardino, Verina Jones, Giovanni Tesio, Carla Marcato, Marco Piccat, Dario Pasero, Giuseppe Goria, Alda Rossebastiano, Fiorenzo Toso, Francesco Rubat Borel; e j'arcòrd ëd Tavo Burat, Gianfranco Gribaudo, Giovanna Viglongo, Claudio Gorlier, Tullio Telmon, Anna Ferrari, Anna Maria Morello e 'd chi a scriv. Dal Canada a rivran ëdcò la Madamin Mirella Clivio e 'l fieul Amedeo. d'Albina Malerba - dal Vënner ëd La Stampa dël 15 ëd fërvé dël 2008

Indietro