Teresio Malpassuto, Poesia monfrin-a

Tre agn apress ëd «Nivuli», Teresio Malpassuto a buta fora sò scond tìtol ëd poesìa monfrin-a, «Làder da stèlji», ch'a l'é publicà ant le edission dël Centro Don Mìnzoni-Ca dë Studi Pinin Pacòt (pp. 104, s.i.p.). Tutun, prima 'd parlé dël lìber neuv, che - coma scriv l'autor - a canta le lìbere vos dël cheur, i vorrìa fé na cita considerassion ch'an ven da la letura dl'achit ëd Gianni Abbate (ch'a l'avìa scrit ëdcò l'achit ëd «Nivuli») e dla testimoniansa 'd Giorgio Bàrberi Squarciti. Sì 'n toca capisse. Se Abbate a scriv che la poesìa monfrin-a «ha avuto e ha voci poetiche di tutto rispetto» e se Bàrberi Squarciti a scriv che la stessa tradission «finora non ha proposto che qualche rimatore e versificatore popolareggiante e facile», ì-j soma pròpe nen. A-i é na bela contradission tra l'un e l'àut. Inùtil sotligné ch'a l'ha rason Abbate e ch'a bastrìa 'l nòm ëd Buronzo për contradì Bàrberi Squarciti. Ma dìt sòn, ch'a l'é nen còsa da pòch, a va dit che la poesia 'd Malpassuto a fa la soa part. Con dlicatëssa e onestà: ch'a son peui nen doi termo da gnente, conbin che ij poeta as sento 'n pò tuj come 'd Dante calà 'n tera a mostene le mistà. Malpassuto a canta 'd moment particolar e stagionaj (ma pì che tut l'otogn), ëd meditassion ëd vita e 'd variassion d'amor con chèich arciam masnà. E tut a fa con ghëddo delissios, gavand da soa lenga paisan-a ëd noause ch'a-j dan aria e a la fan legera come na piuma. A bastrìa fé n'esempi come «Seria d'utün»: «Staseria,/ ant l'ort,/ al cachi/ l'ha rabaià l'ültima lüce/ për fes-nu dal baloti/ culur dal su dl'istà/ e suagnesi». Opurament «Ti...»: «Savei lon che ti 't vöri/ 'l é cme savei/ lon ch' 'i sögna/ 'l rözi». Ch'a l'é na bela «variassion», fin-a na frisa malissiosa, ma bin dita, bin trovà. A-i é 'd componiment pì longh e pì dëstèis, ma la mùsica a l'é cola: dì le còse, bandonesse ai sentiment. Lòn che Malpassuto a dis «essere noi». Lassesse porté da la fiusa dl'aria, 'nsema grassia e vrità. ëd Giovanni Tesio - dal Vënner dla Stampa dël 1 ëd fërvé dël 2008

Indietro