«Le nòste canson» dij Balocco

A peu pré n'an andarera i l'oma scrivù su costa pagina 'd Roberto e Pier Giorgio Balocco për ël lìber ch'a contava la stòria 'd «Le canson dla piòla». I na riparloma ancheuj con piasì përchè a son pen-a surtì doi bej Cd ëd Roberto Balocco «Le nòste canson. Raccolta di canti popolari piemontesi», soagnà da la Libreria Piemontese Editrice 'd via San Second 11, Turin, discografia 'd Piergiorgio Balocco, coordinament editorial ëd Paolo Sirotto. A son 36 canson, 18 sota l'ansegna «da Ambrogio e Lieta a La corenta», e 18 «da L'amante confessor a Magna Gioana», tute - a scrivo ij frej Balocco ant le plachëtte ch'a compagno ij Cd - «di origine remota tramandati dalla tradizione orale, di generazione in generazione, e costituiscono un patrimonio ormai consolidato da approfonditi studi di valenti cultori del folclore» (an fa piasì sité Costantino Nigra, Leone Sinigaglia e Alfredo Nicola) ma a continuo: «abbiamo il piacere di presentare anche alcuni inediti scoperti durante la lunga attività che ci ha portato a battere, palmo a palmo, la terra piemontese». Con la vos e la froja 'd Roberto Balocco, j'arangiament 'd Giovanni Paolucci e Paolo Giolo, la colaborassion musical ëd Giacomo Berutti (violonsel), Carlo Bosticco (fiuta), Mario Bricca (froja), Alberto Giolo (viola), Paolo Giolo (violin), Domenico Mansueto (oboe), Andrea Tedesco (clavicembalo e piano), a l'é dabon na gòj scote «Amor fedel» (Se mi i fissa na rondolin-a/ volerìa su la montagna/ për andeme a riposé..), o «Zolicheur» (Dime 'n pò, bel galant), «A Carignan» (Al lùn-es ëd matin,/ ij soldà l'han da 'ndé via...), «Pelegrin ëd San Giaco»,; «La corenta» (La Teresa a intra an bal/ së Marida sensa fal...); o «La Rondolin-a indiscreta», «Strambòt piemontèis» (Veusto vënì amis a l'osterìa/ la fija dl'òsto a l'é morosa mia..), e 'ncor «Baron Litron», «Carolin-a 'd Savòja» (La bela Carolin-a la veulo maridé,/ ël duca di Sassonia a-j veulo fé sposé..) dabon tut ël mej 'd nòsta tradission pì soasìa. «La lingua piemontese - a scrivo ij Balocco - é efficacissima quando si tratta di esprimere certe piccole verità particolari, ricca com'è di armonie, di finezze e di voci varie...». Ij test dle canson a son tuti publicà ant le plachëtte, con cite notassion stòriche filologiche. Doi gran bej Cd da scoté e da lese. d'Albina Malerba - dal Vënner dla Stampa dël 30 ëd Novèmber dël 2007

Indietro