Un CD d'Enzo Vacca

Sensa ciadel, sensa spatuss, coma a l'é ant la costuma piemontèisa - ancheuj as podrìa disse darmagi! - la mùsica piemontèisa as segnala për neuve arserche ant la carzà dla tradission, e a son giomai tante ij disch ch'i podoma fiché bin rangià ant nòste stagere. A conferma 'd costa neuva vitalità, 'd costa arnassensa silensiosa ma satìa, a l'é pen-a surtì un cd da la «R&G Zedde» con la colaborassion dl'Associassion Coltural «Piemont-Breizh»: Enzo Vacca, «Evoa!». An so tilèt ëd visita, Enzo Vacca as dis sonador d'Arpa Cèltica, compositor e «arrangiatore»; con Vacca ant ël cd a l'han sonà e cantà Francesca Funnone, violoncel, Claudia Bellamino, oboe, Martino Vacca, uilleann pipes, Dominig Bouchaud, arpa, Françoise Le Visage, arpa, Arianna Ferraudo, vos, Giovanna, Dario, Enzo, Alberto Marcilo, Batista Cornaglia, còro; e Arz Neve, Grégoire Hennebelle, violin, Gael le Bozec, violin e viola, Maud Caron, violoncel. Na bela partìa 'd giovo piemontèis e da d'àutre part d'Europa ch'as treuvo ansema për canté e soné, an piemontèis, e ant le lenghe cite 'd tute le tère. N'esempi 'd fradlansa ch'a nas pròpe da le patrie cite. Dedicà a Costantino Nigra ant ël sentenari dla mòrt, parèj Enzo Vacca a spiega 'l sens d'«Evoa!>>: «Nòna, dòme in bicer d'evoa!». Un pò d'eva, për gavesse la sej longh ël gieugh, ant j'istà afoà passà a Ceneuve 'd Govon. Cola eva a l'avìa ël podèj ëd conforté e dë slansé anvers un gieugh neuv, na neuva aventura, con tuta l'energia e la fòrsa 'd na fantasìa e n'anmaginassion sensa lìmit... E a l'é cost arcòrd ch'a da 'l ghëddo al cd: «Cost a l'é - a scriv ëncora Vacca - 'l sens dël travaj. L'eva frësca dël cant antich ëd mia tèra a l'ha pijà vita e arnovà an mi ël desideri ëd soné...e comuniché lòn che 'd pì përfond a esist ant ël cheur dla tèra e dj'òm». Se l'arcòrd, la nostalgìa a son stàite la prima mòla a ispiré l'arserca, la veuja, la passion a l'é cola «ëd vardé a l'ancheuj con ij gust, jë stij e ij langagi musicaj che am aparten-o». 11 tòch (sitoma: «Taca bòrgno», «O mama mia», «Suit ëd Natal», «Masurca 'd Dòro», «Vërdolin»), ch'a fan un cd fiamengh, compagnà da na plachëtta con ij test, ij coment e nòte an piemontèis e an italian. Për trovelo 'nformesse da zedde@zedde.com o da enzo@musicivagantes.it. d'Albina Malerba - dal Vënner dla Stampa dël 2 ëd Novèmber dël 2007

Indietro