Tavo Burat

As dis dl'osel ëd le tempeste («Ala dëstèisa/ sl'onda mossanta 'd vita/ a l'é mia dësfida»). Ma as peul 'dcò disse dl'autor. Tavo Burat a l'é pròpe parèj: n'ala dëstèisa sl'onda mossanta dla vita e dla coltura piemontèisa. Basta ch'as sapia che cost'ala a ven da lontan e a va lontan, a resta nen rantanà ant la gargarìa dle ideje disidratà, respirand ant ël sofe largh dël vent ch'a a possa. Fórse përchè le soe a son ideje 'd poesìa, ch'a veul nen dì ch'a sio baravantan-e, ma ch'a son pien-e 'd cola fòrsa d'«utopia» antërnassionalista ch'a-j dà dë slans a le còse da fé. Adess Burat a conferma soa vocassion poètica (un fil sutil ch'a traversa tuta l'atività 'd sagista, 'd prosator, ëd piemontesista fòrt e apassionà) con na neuva plachëtta ch'a s'antìtola «Ciri vacior (Bird Watching)» publicà da «La Slòira» d'Ivrèja con n'achit ëd Censin Pich e tre ilustrassion ëd Nestore Pozzo (pp. 48, s.i.p.). Na publicassion pressiosa ch'a l'é fàita për la pì part d'haiku a la giaponèisa, ma 'dcò na frisa d'àut, nen ultima la poesìa ch'a sara 'l cit volum con n'anvocassion a «La lum dël chinché»: 'ncora na vota n'alegorìa dl'angage e dla passion che Burat a arversa 'nt la causa piemontèisa: «Ti it soàgnes me cheur ferì/ e it cudìsses tra la gent/ ij me pensé reveur e raminghér». Tut as ten ant ël mond dël poeta: cit e gròss, na fior e na stèila, n'osel e soa fòrsa stërmà. A-i son la boarin-a, l'angigné do dèir, ël coaross e 'l cornagio morné, 'l ghé e la seren-a, 'l cardlin e 'l rampighin, la prussa e la borda, ' rësgneul e la rondolin-a, 'l merlo e 'l passaròt, che 'l poeta a l'ha docià da nòste part. Ma 'dcò 'l «Bien te veo» e l'ornero, che l'ha docià an Argentin-a. E 'dcò d'autre sugestion ch'a ven-o dal mond dla natura tuta e da nòst mangé 'd na vota e d'ancheuj. A bastrìo ij nòm a fé la poesìa (Pascoli a l'é pa mach ël poeta dle lerme). Ma savèj vardé a resta fondamental. Tut as ten an Burat. La tematica e 'l basiricò, la dësfida, l'arvira, 'l drapò. ëd Giovanni Tesio - dal Vënner dla Stampa dël 12 d'otóber dël 2007

Indietro