"Salutme ël Mòro" 2007

J'Amis ëd Piassa dël Mondvì a continuo soa bela euvra 'd promossion e 'd sensibilisassion dla lenga piemontèisa e 'd tute le manifestassion ch'a son gropà a la pròsa e a la poesìa, dai cit ai grand, da le scòle mignin-e a le vijà 'd letura. Tute inissiative ch'a l'han sò moment pì fiamengh ant la premiassion dël concors «Salutme 'l Mòro», che st'agn sì a l'é 'ndàit a Felicina Bonino Priola con «So nebia tëmporà» che Roberto Masante a l'ha come sempe bin cudì për le edission dël Pèilo (pp. 72, s.i.p.). Felicina Bonino a scriv ant la parlada 'd Pioss, ma as peul bin disse che sò lengagi a l'è bin ënreisà ant le rason dla poesìa. An dis che lòn ch'a conta a l'é avèj na lenga ch'a parla 'ndrinta, ch'a ven dal përfond, ch'a l'ha soa residensa ant la memòria dij di masnà, cola ch'a seurt - coma vorìa Leopardi - da la vita primitiva d'ognidun. A batesé na vos ch'a ven da lontan (ëdcò ant ël sens che Felicina Bonino Priola a l'é nen neuva 'd sìcur a la poesìa, dal moment ch'a l'ha al sò ativ n'àut lìber, «Tamp arbris», publicà vint agn fa), a l'é Remigio Bertolino che a soa vòta a l'é un-a dle vos pì avosà dla poesìa nen mach «local», una dle pì sclinte dla poesìa piemontèisa ch'a l'ha pijà 'l vòl. Bertolino a parla 'd «cifra» che «rimane improntata ad una sobrietà estrema, ad un periodare scarno e rastremato». Dit bin, dit giust. A basta deurve 'l lìber për trové conferma. A basta sente le paròle dite come 'n rosare, un-a për un-a, con la fiusa che la fòrsa a l'é lì, stërmà e patanùa: «Veuj vive/ paj ëd na ran-a/ ën brova/ dra tampa:/ scoté/ ër ciap/ do so/ dij romé/ spronfondé/ ënt r'eva/ ar prim sbeuj/ e canté/ tuta ra neucc/ ar ciar/ dra lun-a». Canson, orassion, paesagi, moment, stagion, sensassion, la veuja d'esse, «përchè/ a meurì/ j'é sampe tamp». La gòj d'ëndé a scheuvre - bela rason ëd poesìa - lòn ch'a-i-é «dëdlà», brich dòp brich, va che ti va, coma ant un-a fàula ch'a l'é la serca dla vita dla poesìa, dla poesia dla vita. ëd Giovanni Tesio - dal Vënner dla Stampa dël 14 dë stèmber dël 2007

Indietro