Associassion Turin 1706-2006

«La Fojada guardé bin,/ I lasroma pa pié Turin./ Con le vostre canonade/ Fei pa por a le masnà./ Batì pur la sitadela, Che Turin a s'guarnerà»: a son ij vers d'un-a antica canson popolar cuija da Costantino Nigra ant l'Eutsent, ch'a arcòrda l'assedi e la liberassion ëd Turin dël 1706. Sitassion ch'i gavoma da la bela antologìa 'd test dë scritor «anlitrà» an piemontèis, an fransèis e an italian (da Saint Simon a Edoardo Calandra a Guido Gozzano a Vittorio Bersezio a Marziano Bernardi a Umberto Eco), ant un-a publicassion dla Ca dë Studi Piemontèis: Pier Massimo Prosio, «Vittorio Amedeo, Prinz Eugen, Pietro Micca: l'assedio di Torino visto dagli scrittori», con n'introdussion ëd Luciano Tamburini (pp.84). Ant ël lìber i trovoma antologisà, për lòn ch'a riguarda le testimonianse an piemontèis, 'l Tarizzo dl'«Arpa discordata», Alberto Viriglio, Nino Costa, Arnaldo Soddanino, Carlin Tiochet, e d'àutri, e fin-a col Filippo Tartufari, un poeta roman amis ëd Còsta e d'Olivé. I sitoma cost'euvra për armarché coma a sio stàite bordel le inissiative editoriaj e le manifestassion che da stèmber 2006 a stèmber 2007 a son stàite realisà për selebré coma a fasìa damanca la ricorensa dij tèrsent ani 'd na data stòrica, col 1706 ch'a l'ha decidù le sòrt dël Piemont e forse 'dcò dl'Euròpa. Chi a veul fesse n'ideja 'd lòn ch'a l'é stàit cost aveniment stòrich a gnanca n'ani da le giornà dë studi a l'ha a disposission doi volum ëd pì che mila pagine, ch'a cheujo j'At dël Convegn «Memoria e attualità dell'Assedio di Torino dël 1706 tra spirito europeo e identità regionale», soagnà da Roberto Sandri Giachino, Gustavo Mola di Nomaglio, Giancarlo Melano e Piergiuseppe Menietti, për l'Associazione Torino 1706-2006 ch'a l'é stàita l'anima 'd tute le inissiativa, publicà ant le dission dla Ca dë Studi Piemontèis (2 voll., pp. 1021, euro 40). Pì dë stanta ij colaborador ch'an dan d'aprofondiment dë stòria militar, cartografìa, profij dij protagonista: da Vitòrio Medeo II al Prinsi Eugenio, a Anna Maria d'Orléans, a Pero Mica, al Beato Sebastiano Valfré; e peui studi dë stòria dl'art, devossion popolar, leteratura, costum, tradission. Un travaj fiamengh për conòsse la nòsta stòria, na «gramatica» dla cossiensa për vardé a l'avnì: ricostrùe sla carsà d' un léssich essensial l'angage 'd tante vite e 'l travaj dasiant ëd generassion e generassion, a l'é nen mach arcòrd, ma a val come marca fòrta d'un sente 'd siviltà. d'Albina Malerba - dal Vënner dla Stampa dël 7 dë stèmber dël 2007

Indietro