Le poesìe d'Olivero

Soagnà da Sergio M. Gilardino, a son surtì j'At dël Rëscontr dë Studi tnusse an Alba a la Fondassion Ferrero su «Luigi Olivero. Cantor ëd soa tèra, poeta dl'umanità» (Famija Aìbèisa 2007, pp.116). Sla carsà durbìa con ij Rëscontr antërnassionaj dë Studi sla Lenga e la Literatura Piemontèisa pensà e masentà ant j'ani da Gianrenzo P. Clivio, costi At a arciamo 'dcò ant l'impostassion gràfica l'ideja dla continuità d'un travaj che con la mòrt ëd Clivio a l'ha segnà un moment ëd ripiegament e riorganisassion. Le relassion, ant le tre lenghe 'd coltura 'd nòst Piemont, ël Piemontèis, ël Fransèìs e l'Italian, a veulo esse «un primo tentativo di catalogazione e sistemazione critica dell'opera di Luigi Armando Olivero» ch'a l'é un dij grand dla poesìa piemontèisa dël Neuvsent. Nà a Vilastlon 'l 2 novèmber dël 1909, a l'ha passà na bela partìa d'ani a Roma, dova a l'era giornalista angagià e për cost mëstè a l'ha 'dcò girà '1 mond. Costi ij contribù: Fabrizio Arnaud, «La vita di Luigi Armando Olivero»; Giovanni Delfino, «Inventario e cronologia dell'opera di Luigi Armando Olivero»; Sergio Maria Gilardino, «La hardiesse de l'insouciance: chant déployé et avant-garde sur la palette poétique dë Louis Olivero»; Giuseppe Goria, «La prosa piemontese di Luigi Olivero»; Vincenzo Jacomuzzi, «Adamo ed Eva in America: i romanzi italiani dì Luigi Olivero»; Dario Pasero, «E tuta Roma a l'é parèj 'd na marna: Luigi Olivero, Roma e i poeti romani»; Gianluca A. Ferrini-Francesco Rubat Borel, «Per uno studio della lingua degli scrittori piemontesi. Osservazioni su Luigi Olivero». Pagine satie ch'a deurbo na carzà për n'euvra dë studi completa, ch'a peussa un dì porté a n'edission ëd tuta l'euvra poetica d'un maestro: «Quand che ij sarai pì nen/ s'arcorzeran che j'era./ Róndola 'd primavera/flécia ant ël cel seren,/mi sarai sot na pera, /ti ant na fior sul teren...». d'Albina Malerba - dal Vënner dla Stampa dël 18 ëd Magg dël 2007

Indietro