Gergalment

Arnaldo Colombo a l'é un che da sempe as dedica a arcordé 'l mond ch'a i-é pì nen. Un ch'a vemp l'un cha l'é veuid. Un ch'a serca 'd vince la dësmentia e ch'a ten bon con soa euvra contand an italian e an piemontèis (sò piemontèis 'd Rovasenda, cheur dla Baragia verslèisa) le euvre e ij dì dij mesté, dle risere, dla vita paisana, dle cassin-e. A fela curta 'd tut lòn ch'a l'é stòria cita - a diso parèj - ma stòria ch'a l'ha na soa dignità, na soa manera d'esse, 'n sò sens special ëd campagna e 'd travaj. L'ultima euvra 'd Colombo a l'é 'n librèt ëd poesie ch'a s'ëntìtolo «Sonettàn sonettando...» (pen-a surtìe da Montedit, piazza Codeleoncini 12, Melegnano, pp. 106, euro 8,80). A vardé bin pòch ëd pì che në scartare, ma pien ëd sust e 'd sentiment. Tre quart a son sonèt an italian e l'ùltim quart (la session ch'a së s-ciama «Gergalmente») a son an piemontèis. Sonèt përchè Colombo a dis ch'a l'é la pì bela gabia dla literatura italian-a. Ma «Gergalmente» - për la vrità - as capiss pa tan. A-i é pa gnente 'd «gergal» ant ël piemontèis 'd Colombo. A meno che chiel a veuja dì cheicòs ch'as capiss pì nen, cheicòs che as sa pì nen come a capita le vòte che un a parla për nen fesse capì da tuj. Dit sòn, ij sonèt an piemontèis ëd Colombo as capisso bin. Chiel an parla dëi barlité («Dal pilin a pieuv fresca e dossa/ na pissaròta sot l'argiòch dël sol,/ ël botalin gheub solevà sla testa»), dël pradareu («Ël pradareu a regola l'ùltim ciusòt/ e a pia la stra vers ca sot ël cel ros,/ dë dnans al fòss travërsà da 'n trovòt»). A-i é 'd vòte ch'as lassa 'n pò 'ndé con la nostalgia. Ma pì soens a varda con euj ciair ël sens d'un gest e d'un moment. Coma col bel sonèt bin combinà ch'a parla dla mondin-a sla brova dël pruson damentré ch'a slonga la ponta dël dil «për sfrisé 'l peil dl'eva dla pian-a»: «Na sirimònia ëd vegia tradission,/ na manera 'd segnesse quasi pagan-a/ për artiré la gamba con un tramancion/ për arfudé la penitenza cotidian-a». ëd Giovanni Tesio - dal Vënner dla Stampa dël 20 d'Avril dël 2007

Indietro