Bibliofilìa an Piemont

A l'é capitane pì 'd na vòta da coste pàgine 'd fortì che la lenga piemontèisa a vanta na tradission scrita a parte almeno dal sécol XII. E che la leteratura an piemontèis a l'ha soe «carte 'n régola», coma a disìa Pinin Pacòt: na tradission ch'a l'ha lassà 'd marche soasìe an edission a stampa ràire e bin pressiose. L'ocasion ëd podèj vëdde an giojera chijdun-a 'd coste edission an ven da la mostra «De Libris. Cinquecento anni di bibliofilia in Piemonte» alestìa fin-a al 22 d'avril (as peul visitesse tuti ij di da 10 ore dla matin a 6 ore dël dòp disné), ant ij salon anciarmant dël pian nòbil ëd Villa della Regina (Turin, stra Santa Margherita 79). Pensà e organisà dal Centro Studi Piemontesi-Ca dë Studi Piemontèis, an colaborassion con la Region Piemont, a saré l'ann ch'a l'ha vist Turin Sità Capital Mondial dël Liber, «De Libris» a l'é giutà da la Compagnia di San Paolo, da la Fondazione CRT e da la Camera di Commercio 'd Turin. Soagnà da Francesco Malaguzzi, e da Giuseppe Pichetto, la mostra a conta sinch sécoj d'amor për ij lìber an nòsta tèra: da le racòlte stòriche ch'a son peui për asar spatarasse; a edission gropà a duch, prinsi, re sabaud, colession 'd famije dl'aristocrassia e dla borghesìa, fin-a al Neuvsent con na sërnìa 'd lìber da le biblioteche ëd Luigi Einaudi, 'd Luigi Firpo, 'd Sion Segre Amar, fin-a ai lìber coma euvre d'art dla racòlta 'd Sandro Dorna. An costa emossion ëd blèssa e 'd coltura, un canton cit, ma significativ, a l'é riservà a la «Gramatica» e al «Vocabolari» 'd Maurizio Pipino e a na desen-a d'àutre edission an lenga piemontèisa, da Edoard Ignazio Calvo, al Broferi, ch'a ven-o da la Biblioteca Renzo Gandolfo dla Ca dë Studi Piemontèis e da l'Archivi Viglongo. Ant le doe vetrin-e ch'a ne smon-o na mèssonà 'd rilegature frapante, per noi a fa piasì segnalé la legadura 'd Luciano Fagnola sl'antologia «Poeti in piemontese dël Novecento». Citassion, sugestion d'un tema che da sol a ciamerìa na mostra tuta soa. d'Albina Malerba - dal Vënner dla Stampa dël 13 d'Avril dël 2007

Indietro