Arcordand Luigi Olivero

A l'é un dij poeta pì fòrt dla literatura an piemontèis dël Neuvsent, Luigi Olivero. A l'é un ëd coj ch'a l'han fàit ëd pì për ai-nove manere e langage dla poesìa. Un ëd coj che ansema a Pacòt a l'han travajà për tiré fòra la poesìa piemontèisa da na tradission garga. Un ëd coj ch'a l'han possala a pijé fiusa an chila, a dventé mura e neuva. Chiel a disìa con n'ardiman tut sò: «La leteratura piemontèisa a sta finalment sopatandse da j'ale anurfatije la póver dël sedentarism municipal për ëlvesse a un vòl pì lììber e pì àut ant ël cel dla vera poesìa». E a l'avia d'ideje bin ciàire: «dagià che poesìa a l'é sempre elevassion, ch'a sia scrita an dialèt senegalèis o an grech antich». E a disia 'd còse bin sangià: «A significa pì nen fé rime sartoirëtta con scarpëtta, bochin con basin, cheur con maleur, fé dle longhe tiritere geologiche për conté ij risultati sentimentaj ch'a l'ha dàit l'esame microscòpich ëd tute le giàire dël Valentin». E a fasìa 'd nòm, ch'a l'avìo gnente da spartì con Viriglio e Paggio Fernando. E costi nòm a l'ero Baudelaire, Verlaine, Rimbaud, Leopardi, Campana, Rubén Dario e Mistral. Olivero a l'é mancà des agn fa a 86 agn. Na vita longa pien-a 'd vita. Ma a la fin, forse, 'dcò na solitudin bastansa marcà. D'àutra part a l'era mai stàit tan da conventicole e da confrerìe. A l'era pitòst na person-a daspërchiel. Tutun Pacòt a l'é col ch'a l'ha tenulo a batesim e ch'a l'ha parlane - bin distant për carater e për deuit - con la pì pien-a convinsion. A des agn da la mòrt la Comun-a 'd Vilastlon (pais dova Olivero a l'é nà dël 1909: soma davsin al sentenare dla nàssita!) a organisa con la Fondassion Ferrero d'Alba, con la Famija Albèisa, con l'Associassion «AssOlivero» un rëscontr ch'a s'ëntìtola «Luigi Olivero, cantor ëd soa tèra, poèta dl'umanità» e ch'a së tnirà saba 17 e dumìnica 18 ëd mars an Alba, ant la sede dla Fondassion Ferrero (Auditorium Centro Convegni, stra 'd Mezzo, 44). Sota la diression sientìfica 'd Sergio Gilardino, tanti studios dl'euvra d'Olivero e dla literatura piemontèisa. Saba Fabrissi Arnaud a parlerà 'd «n'ëschiss ëd biografia», Giovanni Delfino dla cronologia dl'«opera omnia», Alfredo Luzi dla scrittura poètica, Dario Pasé 'd Roma e dij poeta roman ant soa euvra, Gianluca Ferrini e Fransesch Rubat Borel 'd soa lenga e 'd sò lengagi. Dumìnica 'd matin a parleran Giusep Gorìa («'l neuv silabare dla literatura piemontèisa») e Vincenzo Jacomuzzi («Ij romans italian d'Olivero»). Peui Gilardin a sara con un tìtol feu e fiame, «L'ardiman dla svantarìa: cant dësvërtojà e avangarda an sla taulòssa poètica 'd Luis Olivé». Un programa s-ciass e titolà ch'a mancrà nen ëd risulté 'n passagì amportant për na descoverta neuva d'un poeta dabon. ëd Giovanni Tesio - dal Vënner dla Stampa dël 16 ëd Mars dël 2007

Indietro