Vijà piemontèisa

St'agn si l'apontament vorsù e sostnù da la Region Piemont (Assessorà a la Coltura) e organisà da la Ca dë Studi Piemontèis, a l'é për lùn-es 18 dë dzèmber a eut e mesa 'd seira, al Centro Congressi Unione Industriale 2, Sala Giovanni Agnelli (via Vela 17). Për anformassion e 'dcò për prenoté a basta telefoné al nùmer 011/53.74.86 (e-mail: info@studipiemontesi.it). As paga nen për intré ma as peul intresse mach fin-a a l'esauriment dij post. A l'é na bela costuma che a Natal le pì bele vos piemontèise a diso për noi 'l son dla speransa dël Bambin. A giuta tuti, chi ch'a cred e chi nò, pensé che cambié as peul, as deuv. E sicome la poesia, poch ò tant, an cambia sempe, a l'é nen stàita n'ideja da gnente sërché n'ocasion për sté ansema e fesse traversé dai ragg che mach la poesia a sa fé luse coma 'n sol an mes a le nebie pì spësse. St'agn sì a fa neuv e a l'é gia na bela partija, bin cudija da chi a l'ha a cheur (a l'ha drinta 'l cheur), fora da tute le interpretassion pì malissiose e fin-a grame, la fiusa e la speransa dël e për ël piemontèis. Na veja stòria che a Natal a conven buté an sena con ël beu e con ël bambin për arcordé che la roa dë temp a arneuva 'dcò la cossiensa 'd na siviltà ch'a veul nen meuire. Për fé son, gnente 'd pì bel che la publicassion dla ristampa anastàtica dla «Gramatica Piemontese» dël médich Morissi Pipin (na parleroma n'àutra vòta) che la Ca dë Studi con la Region a torna a buté 'n condission ëd lese dòp ch'a 1'era fasne n'edission da la Bottega d'Erasmo (la «Gramatica» a sarà presentà pròpe la seira dla vijà da l'assessor Gianni Oliva, da Pier Luigi Bassignana, Giuliano Gasca Queirazza e Albina Malerba). As trata dla prima codificassion (1783) dla lenga piemontèisa che a 1'ha vivù an pien Setsent un temp dij pì sostnù e glorios, col che Pacòt a disija temp dla vera arnàssita dla literatura piemontèisa (mach për dì i nivò, da Pare Isler, cantor dij pì savorì, al médich dle «Faule» Edoardo Ignazio Calvo, il pì pontù e amer). Sensa desmentjé la premiassion dël Premi për n'euvra teatral ant le lenghe dël Piemont bandì da la Region Piemont (Assessorà a la Coltura) che st'agn a l'é andàit a Remigio Bertolino («L'ultim bal») e a Michele Bonavero («Ómo 'd goma»), mentre segnalà a son stàit Marco Gosso («Ël mësté dròlo 'd Lussia 'd Malino») e l'Istituto Comprensiv ëd Sant Stevo Roé («Rico 'l Setmin»). Passagi 'd mes për rivé a le vos dla poesia. Passagi obligà ch'a fan pòst aj nòsti clàssich e aj nòstri modern. As va da Guido Gozzano a Amilcare Solferini, dai doi pilastr dla poesia dël Neuvsent, Nino Costa e Pinin Pacòt, fin-a a le ùltime vos, ch'a ven-o da tute part dël Piemont (per dì, Bianca Dorato, Barbafiore, Tavo Burat, Remigio Bertolino). Con ël final - sòlit - riservà al «Natal» ëd Renzo Gandolfo (stagn ch'a-i ven a son vint'agn da soa mort). Tut son a veul peuj dì ant ël cheur d'un segret luminos ch'a saran j'ator soagnà da la regia 'd Massimo Scaglione a fene sente: Rosalba Bongiovanni, Mario Brusa, Aldo Delaude, Vittoria Lottero, Fulvia Roggero, Marco Voerzio. Na promëssa 'd poesia për na caban-a 'd sentiment ch'a ven-o - come la steila - dai creus dël temp dij temp. Fesse pì visin a la «rassa nostran-a» për sen-tisse omo 'd tute part. ëd Giovanni Tesio - dal Vënner dla Stampa dël 15 dë Dzèmber dël 2006

Indietro