Cheur masnà

A s'ëntitola "Cheur masnà" 'l lìber 'd poesìa ch'a seurt a l'ansëgna dël Pèilo da j'Amis ëd Piassa dël Mondvì (pp. 196, s.i.p.). A l'é 'n lìber-lìber ëd na poetëssa (as dis-lo 'ncora?) ch'a së s-ciama Elisa Revelli Tomatis, na vos ch'as gionta a 'n distret ëd poesìa ch'a l'é un dij pì rich nen mach dël Piemont, ma d'Italia. Na vos - cola dla Revelli Tomatis - giusta e sclinta. Radis, erbo, vigne e spin-e, amis, pòst, gent, colin-e e pian-a, feu e fiame, lus, ombre, përfum (ëd na botega, d'un mnestron...), figure, nòm, paisage e lun-e, silensi (la mare 'd tute le vos, coma a dis Lalla Romano ant ël so "Diario ultimo"). Arciam, color grumele e stèile, parpajòle e avije, ariss e lëmbrì, grij e lusariòle (grun-e tëmme ch'a së sperdo, a-i son ëncora), grign e canson, nebie e ambrun-e, sant e Bambin, mesombre e arcòrd, nìvole e ciòche, fàule e conte (ant ël parlé 'd Carù, ch'a l'é col ëd costa poesìa, "quinte"). Nen cartolin-e 'd poesìa frusta, ma sentiment s-ciass ch'a ciapo ant ël përfond dël cheur e dla tera 'd Langa ("Dossa Langa"), drua e crua. N'apartenensa ch'a l'é 'nreisà, ma a fa cont ëd tante leture e as fërma nen belelì. N'apartenensa ch'a a sa vardesse drinta e antorn. Poesìa ch'a "gita", coma diss la pòrta dël lìber, che l'é 'dcò na diciarassion - coma as dis - ëd "poetica": "Quand ël profil dël vent/ o va pelegrinand/ a sbardé dal fardel/ vos ch'o j'ha cheuji dëscost,/ l'anima a 'riama 'l froj/ al grané dij sentiment/e la man desluvà/ mnà da 'n cheur masnà/ a gita con l'inciòstr/ la paròla sël feuj". Nicola Duberti ant l'achit a parla 'd na religion ch'a ven da le cite còse, da la vita 'd mincadì, da soa fòrsa mai finìa. Dossamar dla vita ch'a baia e ch'a fatiga. Tut sòn a l'é 'l savej 'd na mùsica lontan-a. Paròle 'd poesìa come ampromèssa d'etern. Ël pì 'n là 'd tute le tere. La pi fòrta e resistenta 'd tute le gòj. ëd Giovanni Tesio - dal Vënner dla Stampa dl'1 dë Dzèmber dël 2006

Indietro