La memòria dël temp

A l'è capitane pì 'd na vòta 'd presenté 'd lìber dë Il Punto-Piemonte in Bancarella, përchè a Turin, con d'àutri tre o quat, a l'è un dj'editor ch'a ten-o àut ël drapò dla stampa local, an italian ma 'dcò an lenga piemontèisa, a parte dal mensil ëd poesìa e 'd coltura piemontèisa, diret da Camillo Brero, "Piemontèis ancheuj", che a ògni gir ëd mèis a pòrta an nòste ca, poesìe, pròse, studi, cusin-a, soagnà da bele ilustrassion a color e tut scrit an lenga piemontèisa. Monsù Marra, ch'a l'è pivò dël Punto, a l'è 'dcò sempe tra ij prim a fé seurte 'l calendari piemontèis "për la sità e ij sitadin", ch'a l'ha coma tìtol "la Memòria dël temp" (euro 4). L'arseta a l'è pì o meno costa: buta ansema 'd fiamenghe fòto dël temp d'antan dl'Archivi Chiambaretta; faje scrive le paròla ch'aj compagno da Bruno Gambarotta, Giancarlo Melano (col dl'Associassion 1706-2006), Censin Pich, Michele Bonavero, Massimo Centini, Camillo Brero; pija Giuseppe Goria e Luciano Gibelli che mèis për mèis a faso le "fnestre" an piemontèis con le notissie pì dròle, amusante, anteressante; ciamje a Walter Ferreri, dl'Osservatòri Astronòmich dël Pin, le lun-e; scriv con l'agiut ëd Brero tuti ij dì, ij mèis, ij Sant an piemontèis, cigoja tut ansema con la grafiba 'd Corrado Marra, e varda lì bele e pront un calendari con le frange e ij fiòch (da ten-e 'n bibliòteca). Mëssonoma chijcòs tra le "fneste" dij mèis: i amparoma, ansema aipì avosà, ij nòm ëd Neta Casaloni (1826-1915), "ël pì famos contràut ëd so temp", ch'a l'ha un monument ant la piassa sentral ëd Montevideo, an Merica Latin-a; Giulio Massasso (1915-1997), ch'a l'è fin-a stàit diretor dl'agricoltura ant l'isola 'd Tonga; Federich Tesio (1869-1954), un dij prim grand anlevador ëd cavaj al mond e sòi campion a dominavo j'ipòdromi antërnassionaj, vagnand fin-a 'l Grand Prix ëd Paris. d'Albina Malerba - dal Vënner dLa Stampa dël 10 ëd novèmber dël 2006

Indietro