Ansëgne an quatr lenghe

Panetteria-panaté-bakery-boulangerie. Barbiere-barbé-barber's shop-coiffeur. Idraulico-tolé-plumer-plombier. Për nen dì dle «Riparassion ëd viture», ch'a së s-ciamo 'dcò «Autoriparazioni» o «Car repair» o «Garage». O 'l «Negòssi 'd vestiari» ch'a së s-ciama «Abbigliamento», «Wear» e via fòrt. A son sempe 'd pì ij pòst che a Turin a l'han butà su 'd bele ansëgne, giuste e grassiose, për deje 'n ghèddo gnente mal a dë stra che dësnò a sarìo nen pòch crùe e maldrissà. Pà - antendomse - 'd gròsse novità. Tutun tut a fà e 'l bon gust e 'l bel deuit a son sempe 'd virtù, cite - sicur - ma bin dovrà (la blëssa, comsissìa, a l'é da tute part na presensa ch'a fa gòj). E peuj a-i é na rason pì fòrta 'ncora. Ant un-a sita (ant un-a civiltà?) sempe pì duverta a coj ch'a ven-o da fòra e a coj ch'a van fòra sempre 'd pì, scrive ij mesté an pì lenghe a l'é n'indicassion ch'a va bin pì 'n là dla soa utilità, ch'a l'é gnanca la rason pì amportanta. Lese le nòste paròle piemontèise antrames a cole italian-e o anglèise o fransèise (e magara spagneule) a conferma lòn che l'oma sempe pensà. Che 'l piemontèis as compagna bin con tute j'àutre lenghe. Perché ch'a l'é na lenga bon-a a dì come tute j'àutre. Le paròle a son nen bele o brute second l'importansa social ch'a pijo ant ël temp e ant la stòria, ma second la mentalità ch'a-j dà vita e anima. Tra global e local a l'é 'dcò parej ch'as giuva na partija pien-a 'd sust e rica 'd lòn che ciamoma 'l doman. An tuti ij cas, passé për San Salvare (ch'a l'é 'n pòst-laboratòre) e lese «Vetreria-vedrarìa-glass department-vitrerie», «Tipografia-stamparìa-printing office-imprimurìe», «Elettricista-eletricista-eletrician-eletricien» a l'é 'n bel segn. A dà gòj. A në smija che da le cite còse a passo le gròsse e che as peussa vive bin ant un pòst sentendse sitadin dël mond. Avej radis a veul pa dì esse sarà come 'd cancej. Mentalità duverta a Turin! Ël mej dij «bogianen»! ëd Giovanni Tesio - dal Vënner dla Stampa dël 3 ëd Novèmber dël 2006

Indietro