Ij sonèt an piemontèis e le Esposission. Na manera dësgagià 'd vardé con ironìa

Tajé tre o quat fëtin-e 'd Giaponèis/ E d'autre singh almeno 'd bon Mancia,/ unije con pò 'd Babilonèis/ e con ëd Baròch, col meno conossù.// A mesa cheuita i gionte 'n pò 'd Chinèis,/ una frisa d'Empire, bin dëstendù,/ un pò 'd formagg gratà, Ver Olandèis/ e i-j lasse cheuse, fin ch'a spompa su.// Peui dòp lo serve 'n tàula bin bujent/ contornà con ëd magnifich biscotin/ Moresch, Rinassiment o Bisantin,// L'Assiro a-j dis nen mal sicurament/ e queich pëssion ëd Neo-Grech an general/ a compisso 'l Pudding stil Floreal». A l'é 'n sonet irònich ëd Pare, al sècol Arrigo Frusta, un dij poeta pì dësmorin ëd cola ch'a l'é staita ciamà la generassion dël «Birichin», sicurament ël giornal an piemontèis ch'a l'ha avù vita pì longa. Soa vos l'oma trovala ant un lìber bin cudì ch'a l'é nen an piemontèis, ma ch'a l'ha quaich pagina dedicà a la poesìa piemontèisa dël moment. Ël moment ambelessì a l'é 'l 1902, l'agn dl'Esposission d'«arte decorativa». Ël lìber a l'ha scrivulo Pier Luigi Bassignana e a s'ëntitola «Torino effimera» (Edission dël Capricorno, pp. 202, euro 39,50). Përchè «effimera»? Përchè ch'a parla dle Esposission ch'a son tnusse pì che tut a Turin (ma 'dcò a Londra e a Paris) e ch'a son staite fàite - për dì - 'd giss e 'd carta pista: struture ch'a l'han campà via apress d'avè-je dovrà. Nen pròpe tute - come a arcòrda Bassignana - përchè 'l borgh medieval al Valentin a ven da l'Esposission dl'84 e la Fontan-a Monumental (o dij Mèis), sempe al Valentin, a ven da l'Esposission dël '98, cola dë sinquantenare dlë Statut ëd Carlo Albert. Ma për torné a Pare a n'arfëstìa vëdde che Bassignana a l'ha tenù cont ant la soa euvra dle vos ch'a l'han contribuì a l'«aria dël temp». Arrigo Frusta a l'avija studià al «Cicognini» 'd Prato ('l colege 'd D'Annunzio) e a la savija longa. Le soe composission ansima a le doe Esposission turinèise a l'ha peuj cuije an doi lìber. Un, publicà dal «Birichin», ëntitolà «L'Esposission dël '98-Sonet birichin»: l'àut, «Ij sonet dl'Esposission» - l'Esposission dël '2 - publicà da Lattes. ëd Giovanni Tesio - dal Vënner dla Stampa dël 15 dë stèmber dël 2006

Indietro