Cognësse la lenga e la cusin-a a scòla. Sòma d'aj e bonèt condì con bele rime

Ij lìber ëd cusin-a, ij dëscors sël vin e sël mangé a son tra j'argoment che da senpe a-j piaso 'd pì a j'italian, e an costi ùltim ani 'l Piemont an materia a l'é piassasse ant ij prim pòst, mersì a un teritòri ch'a l'ha savù goerné soe tradission. Parèj coj ch'a l'ero un temp pòst dësvantagià, ancheuj a son conossù an tut ël mond: pensoma ai nòsti vin dle Langhe e dël Roé, e nen mach; pensoma ai nòsti formagg ch'a fan concorensa a coj tant, e giustament, declamà dla Fransa, e son mach d'esempi. E anlora varda sì che 'dcò ij lìber ëd cusin-a nostran-a a pijo sempe pi pòst ant le giojere piemontèise. Ma col che presentoma ancheuj, «Da bërlichesse ij barbis. Parlé, scrive, fé da mangé an Piemontèis», publicà da Gioventura Piemontèisa (contrà 'd San Second 7 bis, Turin (www.gioventurapiemonteisa.net; info@gioventurapiemonteisa.net, pp.36, euro 15, as treuva a la Libraria La Bela Gigogin ëd via Cernaia 16/d), as segnala coma originalità për pìi d'un motiv. Antant a\I'han scrivulo ij cit e a nas ant un laboratòri 'd cusin-a piemontèisa dj'ëscolé elementar ëd Servasca e San Fendent, coordinà da Lussìa Renàud, për ël proget «Arbut ël piemontèis a scòla»; a parla 'd cusin-a ma a veul ansema a 'l nòst mangé fé conòsse nòsta lenga, e peui a parla 'd cusin-a con le paròle che da sempe a son dovrasse, val a dì l'idea a l'é cola 'd «buté 'n sema la cusin-a e 'l Piemontèis - a scriv la Diretris dla Scòla 'd Servasca - Pa che la cusin-a da sola o 'l Piemontèis da sol a sio nen ëd ròbe anteressante: ma buteje ansema a l'ha përmettù 'd superé le dificoltà che le famije soens a fan quand së pensa d'ëmparé a lese o scrive la lenga dij nòsti vej». Parèj quatr grup ëd na vinten-a 'd gagno a I'han comensà sti laboratòri 'd cusin-a piemontèisa: «i l'oma tacà con la sòma d'aj e i l'oma finì con ël bonèt cheut a bagn maria», tut peui «condì» con dle bele Rime «për arciamé a la ment ij bej moment passà a fé da mangé 'nsema e a parlé piemontèis» e dai disegn dle masnà. E peui a-i è chèidun ch'a parla mal dle maestre? Ma ch'a vado a catesse...'l lìber! d'Albina Malerba - dal Vënner dLa Stampa dël 23 ëd giugn dël 2006

Indietro