Un regista ch'a l'é passà a la poesìa sugnand l'amor e l'emossion dla vita

PIER Giorgio Gili i lo conossoma tuti a Turin për ël so angage për ël teatro: a l'ha fondà 'l Centro Culturale Sala degli Intradossi e la Companìa Teatral Teatro Zeta, ch'a masenta an prima përson-a; a l'é regista, a l'ha scrivù për ël teatro e a soagna 'dcò na Colan-a editorial dë studi ansima nòst teatro stòrich, për l'editor Il Punto/Gioventura Piemontèisa. Lòn ch'a l'ha frapane a l'é arsèive neuv noviss un sò lìber ëd poesìe «Slùid e taròch», surtì për ij tipi 'd Gioventura Piemontèisa (pagine 63, 10), con la Prefassion ëd Chicca Morene e ij disegn ëd Michela Pachner (a sarà presentà vënner 26 ëd magg, a neuv ore 'd sèira, ant la sede 'd Gioventura Piemontèisa, via San Second 7 bis a Turin). A son 22 poesìe an italian, ij taròch, dal Bagat al Mat, e 22 poesìe an piemontèis: jë slùid, slusi, lòsne, ch'a son dabon na rivelassion. Coma a scriv Chicca Morene «Quel che maggiormente affascina...è l'accostamento dei versi piemontesi alle lamine, come se ci fosse un preciso impegno nel far proprio il mondo magico attraverso una lingua tenuta viva solo da chi ha mantenuto radici profonde nel territorio». Che le radiss ëd Gili a sio bin fongà as vëdd sùbit da coma a sa dovré 'l piemontèis: an coste poesìe i trovoma 'l cadò d'un bochèt ëd pensé, d'arcòrd, segn d'un mond che chiel a l'ha gravà 'ndrinta ma che a l'ha mai sventajà. E pròpe për sòn coste poesìe a l'han dane d'emossion fòrte, smonende un mond antich e neuv dë stèile, 'd lun-a, 'd sol e ombre, n'arserca genita ch'a pòrta an cormura na religion dla natura e dla vita, sentiment sclin, mascarìa ancantà d'esistensa sensa temp. «Tarde sèire d'istà,/Lus ciàira./ I andasìo, mat d'amor/ a la maròda...»; «Im perd ant la lus ch'a dëstraversa l'euj,/ant la canson cracanta ch'as ëspalia an melodìa./ Le ciòche a son-o ij bot, am ësmija an alegria,/ bele ch'i sai ch'a nunsio 'd sepolture» . E 'l «Commiato», an italian: «Ma/ non avete capito/che volevo e voglio/ soltanto/ giocare?/ E forse ricordare?". Conossìo 'l regista, a l'é nassùje un poeta. d'Albina Malerba - dal Vënner dLa Stampa dël 26 ëd magg dël 2006

Indietro