Un lìber për amprende 'l piemontèis giust për le masnà ch'a s'ëncamin-o

A sé s-ciama «Prima Mignin». A l'han scrivulo tre brave magistre 'd Moncalé, Anna Ferrero, Fulvia e Marina Lupo. A l'ha ilustralo Andrea Chanoux con ëd disegn motobin originaj. A l'é 'n bel lìber për le masnà ch'a veulo amprende 'l piemontèis (ma miraco ai pì grand a-j fa nen mal). A l'ha publicalo la Ca dë Studi Piemontèis con la Region Piemont (via Ottavio Revel 15, tel. 011/53.74.86). A lo compagna 'n cd con la vos ëd Mario Brusa e le mùsiche 'd Michele Burgay (pp. 88, euro 18). A l'é nen ël prim lìber dël géner, ma a l'é 'n lìber ch'a ven da n'arserca avansà ant ël camp ëd cola ch'a se s-ciama «glottodidattica»; mosté 'l piemontèis con n'euj a le tradission e con n'àutr a la siensa dle paròle. Gnanca mal fé se a-i é chi a l'ha la passion ëd mostré, coma a l'han le tre magistre 'd Moncalé. Tut a part da la stòria 'd Giaco e 'd Ghitin, tut a finiss ant un bel glossali pien ëd paròle ch'a son stàite messonà ant ij capitoj; da ala a violèt, da cunij a tripa, da cun-a a tajeur, da ciapinabò a nosera. Tut un mond ch'a pija vita: poesìe, canson, manere 'd dì, conte, contin-e, filastròcole, andvinaje, le bestie, ël temp e ij nùmer, ël sentiment dël temp, ij mesté, ij past, la famija, la vita ant la cassin-a, la scòla. Tut con bel deuit, tut con alegrìa, coma a duvrija esse sempe quand che s'avsinoma al savej. Amprende con ël gust dë scheuvre 'd còse ch'a l'han n'anima. A l'é franch nen na custion - coma cheidun a manca mai 'd fortì - d'esse gropà a 'd radis ch'a s-ciairo nen pì là 'd sò nas. A l'é na custion bin pì larga e duverta. A l'é custion ëd «nen lassesse tajé na lenga». Gnun-e lenghe, bin intèis. Buté man a 'n lìber come cost a l'é 'n lese con gust (pròpe con gust) ma a l'é 'dcò sente (grassie a la vos ëd Mario Brusa) con bela fluidità. Amprende fasand, amprende sentand, amprende vardand, amprende come se tornèisso masnà. A l'é 'l pì bel prinsipe. «Prima Mignin» an giuta. A son le prime splùe ch'a visco cola fiama - coma arcordava Pacòt - che foma cont ëd nen lasse déstissé. ëd Giovanni Tesio - dal Vënner dla Stampa dël 12 ëd magg dël 2006

Indietro