A son tanti ij giovo ch'a cudisso soe radis. Na neuva fiamenga dai cors ëd piemontèis

A son anandiasse ij cors che la Ca dë Studi Piemontèis a organisa për cont ëd la Region Piemont. A l'é l'agn ch'a fa neuv, un bel nùmer ch'a pòrta bin. A son anandiasse an sà e an là për tut ël teritòri regional, da Turin a Vërsèj, da Novara a Cone, da Susa a Ivrèja, da Carmagnòla a Bra, da Biela a Varal, e disoma mach chèicun-e dle sedi ch'a son spatarà a macia d'eule. L'oma ciamaje «Il piemontese oltre» përchè l'oma vorsù sotligné l'ideja che 'l piemontèis a deuv andé pi 'n là, motobin pì 'n là dla soa mòrt che tanti bechin a dan për sicura, sonandje la passà prima dl'angonìa. L'oma ciamaje - sti cors - «Il piemontese oltre» përchè l'oma la fìusa ch'as peussa fesse 'd pì che col pòch për resiste a la blaga dle lenghe pì fòrte (pa veuja d'arnieje, ma 'd resiste a tut lò ch'a pretend d'ocupé e d'invade). Vardé pì 'n là dl'orisont pì meschin a l'é n'angage pà mal, ma 'ntoca onorelo. Ma na bela neuva st'agn sì a-i é. La neuva pì bela a l'é che st'agn sì a l'ha pijà l'andi -pì che j'agn passà - la presensa ai cors ëd tanti giovo. L'oma trovane tanti dabon (e 'd tute età, da tërdes a trant'agn) a Alba, a Carmagnòla, a Ivrèja, an Ast, a Varal, a Novara, a Bra. Ma i dirìo daspërtut. Giovo ch'as mës-cio a j'ansian con bela grassia. A stan lì ciuto come 'd bombonin, ma vardeje a fa vnì 'l gatij dle còse bele, a fa vnì veuja 'd rije për la gòj e për la speransa an festa. A l'é 'n bel vardé. A l'é bel vardeje. A l'é bel poponeje 'n pò. A l'é come dì che 'l doman a fa pì nen por, che l'«oltre» a l'é già sì, e ch'a buta come a la prima le barbe dle piante novele. Lor a l'han n'aria natural, a l'han la curiosità 'd provesse a 'mprende e a cudì la bl«ssa dle càuse perse. Cole che noi l'oma 'mprendù a difende da 'd gent come Pacòt, Clivio, Burat. Gent ch'a l'ha sempe vardà e ch'a varda al doman. Se minca paròla ch'a meuir a tocrìa soné le ciòche da mòrt, për minca giovo ch'as presenta ai cors ëd piemontèis tocrìa soné le ciòche a baudëtta. Contra tuti ij profeta 'd maleur, na gòj ch'a l'é n'investiment capital. Na neuva pròpi bela. ëd Giovanni Tesio - dal Vënner dla Stampa dël 7 d'avril dël 2006

Indietro