Prima Mignin an giojera a Palass Bareul. Na mostra amusanta për grand e masnà

Prima mignin, seconda gatin, tersa ramassa, quarta ... Miraco a-i é ancor cheidun ch'a arcòrda costa cita conta da andoa a s'anandiava la stòria dla scòla d'ògni masnà: le aste, le litre dl'alfabet, ij silabari ... «Prima mignin»: doe paròle ch'a fan nostalgìa, ma ch'a marco 'dcò un temp e un mond; a l'é për sòn che la Ca dë Studi Piemontèis con l'agiut dla Region Piemont a l'avìa ancaminà vàire ani fa un proget ant le scòle cite ciamandlo pròpe parèj. Adess cost nòm a l'é dventà 'l tìtol dla mostra ch'as deurb vënner 17 ëd mars, a sinch ore dël dòp disné, al «Museo della Scuola e del Libro per l'Infanzia», a Palass Bareul, via dle Orfane 7, ch'a espon travaj, disegn, conte, arsèrche, gieugh, color, che ij cit coinvòlt an cost proget an tute part dël Piemont a l'han realisà. A l'é na mostra cita, mignin-a, ch'a l'ha 'l but ëd fé vëdde lòn ch'as peul fesse con ij cit, an manera amusanta, për gieugh, ma ch'a serv a manten-e viv cheicòs ëd nòsta lenga e 'd nòste tradission, na manera bela për gropé ansema le generassion, ij cit con pare e mare, ma ancor ëd pì con ij nòno, le nòne, përchè ant ògni paròla ch'a rij, ch'a canta, ch'a son-a, ch'a bala, a-i é la vita 'd na lenga antica ch'a l'é parlasse, ch'as parla e che speroma ancor as parlerà. Dacant a costa esposission «dij cit», la Fondassion Tancredi di Barolo a soagna na rassegna 'd lìber për la lenga e la coltura piemontèisa stampasse e dovrasse ant Piemont ant j'ani Vint dël Neuvsent. Le doe mostre «Prima mignin» e «Sui banchi di scuola» a saran duverte fin-a al 29 ëd mars (orari dal lun-es al vënner 9.30-12.30; saba e duminica 15.30-18.30) e a son inserìe ant ël përcors ëd visita dël Museo dla Scòla ch'a òcupa quatr pian ëd n'ala 'd Palass Bareul. Museo e mostre a piasran tant ai cit che ai grand. Për tute le anformassion a basta dé na telefonà al nùmer 011/53.74.86, dësnò al nùmer 011/371.66.61 (opurament vardé 'l sit www.fondazionetancredidibarolo.com). d'Albina Malerba - dal Vënner dLa Stampa dël 17 ëd mars dël 2006

Indietro