As deurvo a Turin ij cors dla Ca dë Studi. Na rason dë speransa për nòsta lenga

J'ani marcio an pressa e bele s'a smija mach jer, a son neuv ani che la Ca dë Studi Piemontèis a organisa con la Region Piemont (mersì a la lege regional dël 10 d'avril 1990, mej conossùa coma 26, nà për la tùa, la valorisassion e la promossion dl'original patrimòni lenghìstich dël Piemont, lege che a smija che chijdun a vurerìa sganfé via) ij cors che st'an a s'anandio con ël tìtol «II piemontese oltre. Leggere scrivere parlare», n'ideja dë speransa për nòsta lenga. Ël but a l'é col ëd deje na possibilità - a chi a l'é anteressà, curios, apassionà - ëd parlé 'n piemontèis, amprende a scrivlo, trové dë stument e d'anformassion për conòsse l'antica e moderna leteratura. La scomëssa a l'inissi a l'era 'd dimostré che scrive 'n piemontèis a l'é nen, coma serti a continuo a chërde, impossìbil o mal fé. Ancheuj i pudoma dì che la scomëssa i l'oma vinciula, e a venta andé «oltre», andé anans. Pì 'd sinchmila iscrit an cost arch d'ani d'atività a dimostro che la veuja 'd nen lassese ranché via la lenga e la coltura a l'é chërsùa, p ròpe pèrchè a l'é chërsùa la cossiensa che për esse sitadin dël mond a venta avèj 'd radiss bin fongà ant un pòst. Për ël 2006 ij cors a son vintedoi spatarà an le eut province e 'n tanti d'àutri pòst ch'a son Aich, Alba, Ivrèja, Moncalé, Mondvì, Pinareul, Salusse, Varai, Carmagnòla, Savian, Bra e Ciriè ch'a ancamin-o mach st'an, e Roma. Duvert a tuti, sensa damanca 'd gnun cotis, ij cors a son fàit d'eut lession ëd doe ore pr'un. Na tranten-a 'd professor qualificà a mostreran a scrive, lese, parlé 'l piemontèis, a conòsse la lenga e la literatura piemontèisa. A Turin le lession a ancamin-o lùn-es 6 ëd mars, e as ten-o coma a l'é ormai bela tradission ant la sede dla Biblioteca Cìvica Alberto Geisser ëd Cors CasaL 5, da sinch a set ore apress disné. Për iscrivse e avej 'l programa 'd tuti ij cors, telefoné a la Ca dë Studi Piemontèis (tel. 011/53.74.86, fax O11/53.47.77, e-mail: info@studipiemontesi.it}; opura a basta andé a la prima lession 'd minca pòst e iscrivse lì d'amblé. d'Albina Malerba - dal Vënner dLa Stampa dël 3 ëd mars dël 2006

Indietro