Gent, gest, gust e anvìe per andé pì adase ant un bel lìber ëd conte e d'arsete da gòde

Manco mal che trames a tante gran-e, incomprension, paròle fruste, polemiche ch'a l'han gnun-e teste, legi e propòste baravantan-e, l'editorìa an piemontèis a treuva sempe soe stra. A l'è '1 cas dla Neos Edizioni 'd Cassin-e Vica (Rivoli) che da pòch a l'ha ancaminà a publiché 'dcò 'd lìber an lenga piemontèisa: e a l'è fresch fresch d'inciòstr «Conte e pitanse për na sman-a. Racconti e ricette per una settimana», scrit an piemontèis da Vittoria Minetti, con tradussion an italian a front (pp. 144, ? 10) e con un bel «Achit» ëd Bario Pasero. Canavzan-a 'd San Giòrs, Vittoria Minetti a l'è nen un nòm neuv tra chi a scriv an lenga piemontèisa, përchè a l'ha già d'euvre soe, an particolar për ël teatro. Adess a në smon un lìber bin original përchè a mes-cia leteratura e cusin-a, arsete 'd na cusin-a «vivùa» e stòrie 'd vita, antërsà ansema, j'un-e ch' as arciamo a j'àutre, ant set capitoj ch'a son ij set di dla sman-a, dal lun-es a la dumìnica. «Ël sercc as sara - a scriv Pasé - la tèra a produv e a salva, la tèra che an dà ij sò prodot naturaj an dà 'dcò la sàiva dla lenga e dla narassion (na vira oral, àora scrita) për salvene da la confusion ëd la modernità, dle vire andiferenta dj'àutre marastra...». Parèj lese «Granda a contava», o «Nata», o «La sèira dij Sant», o l'arseta dij «Bagnèt për ij bujì», o d'«J' anciove al verd», as preuva l'istessa gòj, l'istess interesse, la midema passion. E fìn-a mi ch'i son gnanca bon-a a fé doi euv al palèt, i son godime j'arsete coma na conta antica e bela, ch'am m'arciama arcòrd e profum, paròle e gent, gest, gust e anvìe, seugn e nostalgìe, euvre e di 'd mia tèra. Le fòto d'antan an bianch e nèir, ch'a son spatarà ant le pàgine con armonìa e bel deuit, a son ëdcò lor part d'un savor dël temp: e a l'è nen mach nostalgìa, a l'è un valor ch'as gionta e ant ël trafen dij dì an giuta a marcé un moment pì adasi, slow, as dis...). Chi a l'è anteressà al lìber a peul trovelo ant le librerie piemontèise o ciamelo a la ca editriss Neos ëd Cassin-e Vica (basta telefoné al nùmer 011/957.64.50). d'Albina Malerba - dal Vënner dLa Stampa dël 20 ëd gené dël 2006

Indietro