An via Cernaja na librerìa neuva novanta con tut lòn ch'as publica 'n sël Piemont

Lìber an piemontèis, e lìber an sël Piemont, an costi ani a son publicasne për boneur tanti. J'editor ch'a l'han vardà con euj speciaj a cost setor che na vòta as costumava dì 'd «nicia», a son chërsù coma ij bolè: se ancheuj i fusso bon a buté giù na bibliografìa piemontèisa completa is troverìo con un bordel ëd pagine, bele mach se artajeisso cole an lenga piemontèisa. Ma la ròba pì difìcila a l'è troveje. Internet a peul dé sicurament un bel agiut, ma le giojere dle librerìe a smon-o tanta cla ròba che gavesse dj'euj sùit a andé sgaté la cita ròba ch'i sercoma o che l'oma lesù, an fa piasì pensé, segnala an costa pagina, a l'è n'afé 'd doi 'ndrit. A Turin un servissi bon a l'editorìa 'd ca nòsta a la fan da tanti ani Piemonte in Bancarella 'd cors Siccardi; la Libreria Piemontese con soe doe boteghe an via San Second e an via Garibaldi, a doi pass da piassa Castel, cheur viv ëd Turin. Ma che an costi ciàir ëd lun-a për la coltura e për cola nòsta an particolar, n'associassion giovo e ardìa a l'abia avù 'l corage 'd deurbe na neuva librerìa, a l'è n'afé ch'a fa piasì. Gioventura Piemontèisa a l'ha durbì da pòch na «Libraria 'd Piemont», batiandla «La bela Gigogin», un nòm mossant e bin anradisà an nòsta tradission, combin forse ancheuj un pòch dësmentià. Alberto Viriglio ant sò liber «Torino e i torinesi», parland dle canson ch'a son fiorìe ant j'ani dël Risorgiment, a arcordava che la «Bela Gigogin coetanea del Nazionale risorgimento vive ancora nelle fanfare dei bersaglieri»; e «La Bella Gigogin», a l'è 'dcò un dij romans ëd Luigi Gramegna; e a l'è 'dcò 'l tìtol 'd na comedia a sò temp tant rapresentà. Tut son për dì che a në smija un nòm andvinà për na librerìa giovo, ch'a veul buté ant soe stagere «tut lòn che un a peul serché an sël Piemont»: lìber, cd mùsicaj, cd-rom, vhs, ëd tuti j'argoment, an piemontèis, ossitan, francoprovensal, tittschu, italian. A l'è an via Cernaja 16: varda lì 'l dëstin dle ròbe, nòm e pòst ch'a s'arciamo. Na bela inissiativa e j'auguroma ch'a-j pòrta boneur. d'Albina Malerba - dal Vënner dla Stampa dël 28 d'otóber dël 2005

Indietro