Arpijà da Viglongo un dij sò lìber pì bej "Fruta madura" an vestimenta stòrica

A l'avìa 'ncaminà Andrea Viglongo con la sigla dla S.e.l.p., peuj Nino Costa a l'é dventà n'agn d'apress a l'àut ël poeta che la Ca editriss Viglongo a l'ha pijà come sìmbol e misura 'd n'ideja 'd poetica e 'd literatura. Adess Giovanna e Franca Viglongo a l'han arpijà a publichene le prime edission conservandije la vestimenta stòrica (ilustrassion dij pitor Bosia, Da Milano, Enrico, Vellan, Gemma Vercelli) e giontandije mach l'essensial për deje n'arzentà (na prefassion ëd Giovanna Viglongo cha compagna l'introdussion d'Andrea Viglongo). Pì che tut as trata 'd fé arvive 'l passà, ancaminand da "Fruta madura" (pp. 212, euro 12,50), ch'a l'é 'l lìber 'd mes (1931) ant la carzà che Costa a l'ha marcà con soe euvre. Dòp "Mamina" (1922), dòp "Sali e peiver" (1924), dòp "Brassabòsch" (1928) e prima 'd "Ròba nòstra" (1938), prima 'd "Tempesta" (1946), surtì apress la mòrt dël '45 (sinquanteneuv agn crasà dal magon patì për la mòrt dël fieul Mario, partigian an val Chison). "Fruta madura" a conferma lò che Riccardo Massano a l'ha dit pì che na òta e prima che tuj: che an Costa la poesìa a l'è soa vita e la vita a l'è soa poesìa. N'equivalensa ch'a smijrìa facila e anvece a l'é ràira come le còse ch'a stermo lë sfòrs. S'a-i è na legenda ch'andarìa giumaj dësfàita a l'è giusta cola dla facilità 'd Nino Costa a scrive. A-i é tut da fé da la mira filològica, ma l'é fin-a tròp facil dì che le còse a sio diverse. Poesìe come "Stupinis", "La copà", "La Consola" (sensa dine d'àutre magara meno longhe ma nen pòch sislà) as peulo nen scrivse sensa travajeje tornandje 'nsima pì e pì òte. Dëdlà 'd tut, arson-o serti vers ch'a resisto a la memòria come 'n dorin ch'a bèrlus: "Ma sla trama ordinaria - pì satija, pì ràira - che 'l temp a cus e a dëscus, mincatant a së s-ciaira col fil pressios ch'a lus e a basta da chiel sol për deje a la stròfa grossera n'aria sgnora, legera pien-a 'd finësse e 'd sol; coma na primavera fiorìa s'na sëppa 'd rol". Bërluse 'd poesìa. ëd Giovanni Tesio - dal Vënner dla Stampa dël 16 dë stèmber dël 2005

Indietro