Gent ëd cassin-a e tèra vestìa d'anciarm ant soa prima racòlta 'd poesìe 'd natura

As peul disse un poeta paisan, un che a na serta mira 'd soa vita a l'ha capì soa stra e a l'ha 'ncaminà a scrive an piemontèis. Giovanni Teti, nòm ëd piuma Siolòt¯, a l'é un giovo (nà dël 1963), na neuva leva dla poesìa nòsta, ch'a l'ha vivù gran part ëd soa gioventura a la cassin-a "ciabòt" 'd Rosta, 'l pais dij sò cè. E col mond, cola soa gent ëd cassin-a, cola tèra, l'anciarm ëd cole stagion ancantà a son dventà ant ij sò euj e ant soa anima, testimoniansa 'd vita, arcòrd passà a lë spovrin dl'amor, për fesse paròla scrita, poesìa sclinta e bela. Dòp tanti arconossiment ai diversi concors, a-i seurt adess për ij tipo d'un brav editor ëd Rivoli, Neos Edizioni (via Genova, 57, basta telefoné al nùmer 011/957.64.50), soa prima racòlta 'd poesìe "Arcòrd an via ciabòt" (pp.83, tradussion an italian, bele fotografìe d'antan, euro 10): "A-i é an via ciabòt/ una veuja 'd cassin-a,/ mi, ti e nòna Pina,/ i munzìo '1 làit për la vsin-a:/ Ij cunij e le galin-e/ a durmìo sle fassin-e/ Ël can baulava fedel/ pr'ij pito ch'a fasìo rabel./ La fnera, la stala, ël grané/ ël gioch, l'òrt, la vigna,/ a portavo tut ij frut/andrinta la cavagna/../A-i é pì gnun an via ciabòt,/nì mi, nì ti, nì nòna Pina,/ mach pì n'arcòrd ant ël gariòt". Arcordé, a scriv Camillo Brero ant la Prefassion, "a l'é deje vita neuva a col passà che i portoma scrit ant l'anima. A l'é pròpi scotand costa vos (vos che, andrinta al sangh a n'arson-a sò messagi) che 'l temp vivù an confida ij segret vestì 'd poesìa¯. E Teti a viv fongà drinta a la natura scotand tute le vos che la tèra a confida: "Më stërmo ant ël mes dël bòsch,/im bogio ansema a j'àutri,/sla ponta d'un brich tut fosch/ I vardo travers le feuje/ le stèile ch'i riesso nen a toché/mentre ij branch a fan badaje". Firmand-se an poesìa "Siolòt", Teti a inarca soa ispirassion, fidela a un temp e a un pòst e a veul esprime - 'ncora Brero - "col sens doss e amèr che la vos ëd sò messagi a stërma andrinta", ch'a l'é peui la roera dla vita 'd noi "gent ëd viage". d'Albina Malerba - dal Vënner dla Stampa dël 10 ëd giugn dël 2005

Indietro