Petission për la lenga piemontèisa

Ij partessipant al Rëscontr antërnassional dë studi an sla lenga e la literatura piemontèisa che a fa 22, a l'han sotsignà na "Mossion për la lenga piemontèisa" për ciamé: "che la lenga piemontèisa a peussa gòde dla protession garantìa da la Carta europenga dle lenghe regionaj o minoritarie, tratà dël Consèj d'Europa n.r 148. dël 2 d'otóber 1992, sotsignà dal Govern italian al 27 ëd giugn dël 2000; a ciamo che, a antegrassion e përfessionament ëd lòn ch'a réssita la lèj ëd lë Stat n.r 482/99...la lenga piemontèisa a ven-a giontà a la lista dle lenghe da arconòsse e garantì;...a ciamo l'istitussion ëd càtedre 'd lenga e literatura piemontèisa ant l'Università 'd Turin e dël Piemont; a sotligno l'amportansa dij cors ëd lenga e literatura piemontèisa istituì da la Region Piemont conforma le lèj regionaj 26/90 e 37/97, a manifesto sodisfassion per sò arzultà e as ëspeto che a ven-o potensià sempe 'd pì;...a ciamo che, an prevision dij Geu olìmpich ëd l'invern 2006, as fasa an manera che 'l piemontèis a ven-a considerà lenga co-ufìssial ant la sirimònia d'overtura e arlongh tut l'arch ëd le manifestas-sion; a ciamo che as daga tuti ij dì dë spassi ant ij media, spece a la television, a 'd programa d'anformassion e colturaj an lenga piemontèisa;...a giùdico che na conossensa pì ancreusa dla siviltà dël Piemont e l'acoliensa 'd coste arceste...a peus-so creé le condission përchè la lenga piemontèisa, ancheuj penalisà da 'n malvorèj che a ne dësconòss fin-a soa stòria e so pòst ant ël present e ant l'avnì, a peussa arpijé 'd fòrsa e dë slans e rapresenté 'nt la neuva Europa libera e an pas, contra minca spiatliment coltural e ravagi dle rèis, la marca e l'anima dël pòpol piemontèis". dal Vënner dla Stampa dël 3 ëd Giugn dël 2005

Indietro