Paisagi e stagion, bon deuit e religion ant un lìber ëd Giovan Battista Gallino

A-i é 'ncora 'd përson-e da bin ch'a fan le còse dabon, l'é gnanca tan amportant ch'a sio 'd còse amportante. A basta ch'a sio magara cite, citissime, ma cudije con afession e con passion. A l'é giusta lòn ch'a l'é capitaje a 'n lìber 'd Giovan Battista Gallino (1910-2004), un poeta nà a Rivoli e mòrt a Pancalé, a la ca d'arpòs ëd San Gaetan. Ël lìber a s'antitola "Sota la vòlta dël cel" e a l'é stàit cudì da Luciano Cerato (për chi a l'abia veuja d'avèjlo, basta telefoné a Pancalé, al nùmer 011-973.44.75 ma basta 'dcò scrive per via eletrònica a: luciano.cerato@libero.it). Poesìe - i disìa - ch'a fan pà brajé al miràcol. Poesìe sempie coma l'é sempe capitaje ch'a l'abio scrivune (e 'ncora a na scrìvo) doa ch'a resist un sofi 'd sentiment. Poesìe ch'a s-ciòdo da na necessità 'd dì cheicòs ch'a ven dal cheur. E se na parloma sì a l'é nen për dì ch'i l'oma trovà 'n poeta da nen perde. A l'é nen lì la costion (ma gnanca sarìo tan sicur che cheicun dij poeta ch'a fan parlé 'd lor ancheuj a sio peuj destinà a passé ant ël Parnas ed j'imortaj...). Lòn ch'a conta, sì, a l'é na lession d'umiltà e 'd rispet; na lession - bin intèis - dàita sensa intension ëd dela, sensa gnun-e presunsion. La poesìa 'd Gallino a manca nen d'ingenuità. A l'é poesìa ch'an parla 'd paisagi e 'd pais, dë stagion e d'ocasion, d'amor e 'd religion, 'd bon sens e 'd generassion, ëd moral e 'd tradission. Con paròle ch'a l'han nen tëmma 'd soa ombra e ch'a canto con tuta soa mètrica a pòst (pì soens sonèt, pì da rèir d'àut), Gallino a toca chèich vòte la grassia dl'idili; "Le stèile as dëstisso dasiòt a un-a a un-a,/ la primalba carëssa l'orisont/ solitària an cel resta la lun-a". D'àutre vote a lassa core soa moral: "Ognidun edifica la soa stòria/ antërsà 'd delusion e dë speransa/ d'àut e bass come 'l biauté 'd na balansa/ tra difet e virtù e la vanaglòria". La presentassion dl'avocat Franco Manassero - combin ch'a sia 'n pò balarin-a - a l'ha la giusta disposission 'd simpatìa che 'n lìber parej a manca nen ëd merité. ëd Giovanni Tesio - dal Vënner dla Stampa dël 20 ëd magg dël 2005

Indietro