Publicassion, presentassion, discussion a la Fera dël Lingòt e a la Pamija Turinèisa

Magg a Turin a veul dì da disdeut ani Fera dël Lìber. Fin-a al neuv ëd magg la pì granda librerìa d'Italia a në smon al Lingòt n'ocasion d'or ëd vëdde 'n mar ëd lìber d'editor dai pì avosà ai pì cit e malfé da trové fin-a ant le librerìe specialisà. E sòn a va3 ëdcò për ij lìber an piemontèis. A lë Stend D51 dël Pad. 1 trovoma la Viglongo che st'ani për marché ij 60 ani d3a Ca Editris e ij 60 ani da la mòrt dël poeta Nino Costa a presenta n'edission special dla racòlta «Fruta Madura»; sempe al Pad. nùmer 1 Stend D53 la Ca dë Studi Pinin Pacòt-Centro Studi Don Minzoni e Piemonte in Bancarella, con j'Armanach, 'l Vocabolari 'd Brero, e 'l mensil «Piemontèis ancheuj»; e ancor al Pad. nùmer 1 Stend C60 la Daniela Piazza, con ël famos Dissionari Neuv Gribaud e le poesìe an piemontèis ëd Giovanni Arpino, «Bocce fërme». Al Pad. nùmer 2, Stend J02-K03, a-i é la Ca dë Studi Piemontèis (ch'a smon tra le novità l'edission dij «Sermoni Subalpini» e le antologìe dla Leteratura Piemontèisa) ansema a L'Artistica Editrice 'd Savian (l'editor dël Vocabolari Sant'Albin e dla Gramatica ëd Brero). Mach për site­ne cheidun. La lista a dovrìa continué, ma a toca arcordé che ant ij di dla Fera, ël saba 7 e la duminica 8 a Turin, a la Famija Turinèisa, via Pò 43, as ten ël «Rëscontr antèrnassional dë Studi sla Lenga e la Literatura Piemontèisa», che a radun-a per l'edission ch'a fa 22 na bela partìa dë studios, coma a l'é soa bela costuma. A parte da neuv ore dla matin dël saba, dòp l'overtura 'd Censin Pich ch'a presenta 'l Rëscontr, a antërven-o Sandra Paoli e Giuliano Gasca Queirazza. As arpìa peui a tre bòt dël dòp disné, sempe ant ël Salon Turchèis, con Tavo Burat, Sergio Gilardino, Alda Rossebastiano, Elena Papa, Fransèsch Rubat Borel. Duminica 'd matin a l'é la òta 'd Norma Brarda de Bruno, Dumini Vineis e 'd Gianrenzo P. Clivio. Un programa s-cìass për n'ancontr ch'a rapresenta un dij moment pì àut e pì amportant dle studi sla lenga e la literatura 'd nòsta Ca. d'Albina Malerba - dal Vënner dla Stampa dël 6 ëd Magg dël 2005

Indietro