Anternassionalism e scritura 'd Tavo Burat ant ij sò editoriaj gropà a rason e passion

Giacobin, tuchin, vasta-feste, viton o bërgé raminghèr, Tavo Burat a l'é prima 'd tut un poeta ch'a sent la lession dij poeta dl'arvira piemontèisa, da Calvo a Broferi, da Costa a Pacòt. Adess che l'oma sì sota j'euj 'l volum bel gròss e fosonant ëd soa militansa, podoma bin dì che Tavo a l'é 'dcò'n maestro. Un volum ëd 366 pàgine ch'a së s-ciama «Lassomse nen tajé la lenga» (a smija n'imperativ e 'nvece a l'é na racomandassion). A l'han cudilo Luis Magnani e Alberto «Vento» Brizio, a l'ha scrivune na prefassion Anna Maria Sarno, a l'ha publicalo Alp (për catelo, basta scrive a Cessato, Via Vercellotto 3). A cheuj trant'agn d'editoriaj che Tavo Burat a l'ha giusta scrivù për «Alp», soa creatura cudìa con na passion special. A l'é 'n lìber che tuti coj ch'a l'han a cheur la tua dël piemontèis a duvrìo lese. Le rason a son nen pòche. Prima 'd tut a l'é n'ideare, vis a dì n'erca pien-a d'ideje, peui a l'é na testimoniansa e na militansa - diomlo sùbit - ëd libertà. Ancora, a l'è na bibia (diroma nen un vangeli) 'd consigne për ël passà ch'as fa doman. An ùltim a l'é cheicòs ch'a së riess nen a definì, përchè ch'a l'é na lession dë stil (sò piemontèis largh e fiamengh), e donca nen mach dë scritura: vuroma dì d'umanità, 'd corage, 'd coerensa 'd vita. Tavo Burat ambelessì a-i é con tuta l'inteligensa d'un cheur sensìbil e apassionà. Le soe posission a son cole d'un ch'a pensa, ma ch'a l'ha 'ndrinta la «fiama ch'as déstissa nen». Se duvìjsso strense 'n tre o quat passage tut lò ch'a-i é sì 'ndrinta, dirìo: difèisa ativa dle minoranse (n'anternassionalism dle minoranse); contra tute forme 'd rassism e d'intoleransa, l'autonomìa dle diferense («për feje fruté, për cognississe, për amprende e për mostré, për socialisé le richësse culturaj»); contra tute le ciòche ch'a son-o a mòrt, difèisa sensa gena dël piemontèis e 'd soe parlade, ma sensa dësmentié la fòrsa 'd nòsta tradission regional. Da la Carta 'd Civass a l'arvangia dij p om tut as fa cossiensa viva 'd na scòla sensa padron. ëd Giovanni Tesio - dal Vënner dla Stampa dël 29 d'Avril dël 2005

Indietro