Da Turin a Canèj na fiorìa d'anteresse antorn a la lenga e a la literatura 'd ca

I penso nen ëd falime s'i penso ch'a sia mersì a na bela partìa d'ani 'd travaj, fàit con cheur e passion da tante associassion e tante përson-e da un canton a l'àutr dël Piemont, se ancheuj i podoma vëdde na neuva fiorìa d'anteresse antorn a la lenga e la literatura piemontèisa. Na marca 'd costa arnassensa a son ij lìber ch'as pùblico. Për segnalane cheidun i veuj parte da n'euvra motobin amportanta: la "Gramàtica astesan-a" 'd Giancarlo Musso, publicà da pòch da Gioventura Piemontèisa (Contra 'd San Second 7 bis, Turin, pp. 180), che l'autor, bricolin ëd Sessant, a l'ha scrivù "con grinor" për "ij giovo, për ch'i 'mprendo" e per ij "vegg, për nen ch'i dësmentio". Darmage ch'a sia mach scrit an italian 'l lìber ëd Walter Goglio, "Mestieri storie e personaggi del vecchio Piemonte" (Edission Daniela Piazza, pp. 214, euro 15), ch'a l'é na vera minera 'd mësté, gest, travaj ch'a son përdusse o che a stan për sparì, spiegà e ilustrà da l'autor ant ij pì cit e segret particolar: dal magnin al molita, dal materassé al maslé, a lë spaciafornel al vëdrié. Publicà a Turin për le edission "Cultura e Società" (via Cesana 56, tel. 011/433.33.48, e-mail: cultsoc@fastwebnet.it) a l'é pen-a surtì un neuv bel lìber ëd poesìe ëd Piero S. Costa 'd Non, "Diari 'd n'arnosa preuva. Stòria che 'nen' l'é stòria": poesìe ch'a son come na carëssa sël cheur, ch'a giuto a pasié për un moment ël dolor ëd vive. Da Canej an riva anvece në scartari ëd "Conte, fàule e legende dla tradission popolar piemontèisa", 'd Guido Musso, soagnà da Censin Pich. A l'é 'l sest publicà da la Sita 'd Canej, Assessorà a la Coltura-Biblioteca Comunal, e a cheuj na sernia 'd pròse piemontèise premia ant ij concors "Sità 'd Canej" ant jë scond des ani dël premi. Squasi na quaranten-a 'd conte ch'a son l'arsultà d'ani d'arserche dle tradission popolar portà anans da Barba Guido: un travaj pressios për salvé da la dësmentia un patrimòni 'd memòria e 'd coltura, ch'a sta për vantesne vìa për sempe. d'Albina Malerba - dal Vënner dla Stampa dël 15 d'Avril dël 2005

Indietro