| Un cd con canson d'antan e d'ancheuj cantà da Laura Conti e Maurizio Verna |
|
A l'ha un tìtol poétich "Sfiam d'Argal", e a l'è un Cd neuv, nen mach
përchè a l'è pen-a s-ciodù fora dla cavagna dl'associassion coltural "La
slòira" d'Ivrèja, ma për ël but ch'as propon. A veul esse na sfida, n'azar.
Ël proget a pija l'andi da l'ancontr ëd tre përson-e ch'a son ëdcò ij
protagonista dle propòste musicaj dël disco: Dario Pasero, poeta e scritor
piemontèis da sempe angagià ant lë studi dla lenga e dla literatura
piemontèisa; Laura Conti, cantante e atris ch'a l'ha colaborà con Paolo
Conte, Giorgio Gaslini, Giorgio Albertazzi, e che da vàire ani a l'ha a
cheur ël patrimòni coltural ëd soa tèra, an manera particular dël Canavèis,
ch'a sa smon-e ël repertòri tradissional con vocalità moderna motobin soa e
soagnà; Maurizio Verna, chitarista e compositor ch'a l'ha da la soa ani 'd
travaj con ëd grup 'd mùsica ètnica piemontèisa, e ch'a firma le mùsiche
dij tre test d'autor dël disco: "Giardin" ëd Pasero, "Lun-a Pien-a" 'd
Gullino e "Col dòp disné a Savon-a" d'Origlia. Lòn ch'a gropa cost travaj a l'è la convinsion che ansema poeta e musicista a devo trové na neuva carsà a pro dl'arnovament dla canson piemontèisa d'autor, che a sapia andé dëdlà dl'imitassion dla tradission d'antan. "Sfiam d'Argal", an costa stra a marca un passagi tra la produssion popolar e cola d'autor dël passà e d'ancheuj. J'àutri tòch, ant tut a son dodes, a son n'interpretassion dle pì bele canson dël repertòri popolar: da "La Monfrin-a" a "Maria Gioana". La vos a l'é 'd Laura Conti, con la chitara a des còrde 'd Maurizio Verna, e con Massimo Pitzianti a la fisa, Diego Zanetto përcussion, Federico Biribicchi violin, Lorena Borsetti, violonsel, Emanuele Bellis la viòla dij bòrgno (për anformassion: www.lauraconti.com; www.maurizioverna.it; dario.pas@tiscali.it). Ël risultà a l'è un disco original, ch'a fa gòj scoté e cha l'è franch na conferma 'd lòn ch'a disìa 'l nòst poeta Nino Costa: "Quand che ij pare a stago ciuto s'ancamin-o ij nòstri fieuj". d'Albina Malerba - dal Vënner dla Stampa dël dël 4 ëd mars dël 2005 |
|
Indietro |