| Al Castel ëd Massel duverta na bela mostra 'd flecie, trator ëd bòsch, tombarej e carëtin |
|
Cite dësmore për masnà dësmorin-e. Le dësmore pì pòvre, le pì rustiche, le
pì paisan-e. Cole che l'oma fàit an temp a conosse 'dcò noi, da masnà 'd
famije nen pròpe ari-stocràtiche. Ròbe gropà 'd filsela o 'd filfer, ròbe
fàite pì 'd gnente che 'd pòch, ma pien-e d'astussia e 'd fantasìa. E noi i
giontavo lò ch'a-i mancava, s'a l'era 'n motor da bòsch, 'l pr pr lo fasijo
con la boca e la molavo pi nen. Adess tut sossì, për ël gust d'arcordé e 'd fé arcordé, a l'è dventà na mostra, al Castel ëd Massel, an sla stra ch'a va da Pinareul a Carmagnòla. La mostra a s'antitola "Gioco e giocattolo povero" e a l'ha pensala Gianni Chiattone, ch'a l'é nen neuv a 'ste inissiative (duvert tuti ij saba dòp mesdì del mèis ëd fërvè, da doi bòt a ses ore, e tute le duminiche da des ore dla matin a ses ore dël presdisné, sinch euro për ij grand, la metà për le masnà fin-a a quindes agn: për d'àutre anformassion e për prenoté, basta telefoné al nùmer 0121/34.05.91). A-i è le flecie për ciapé ij passaròt (a l'era pì fàcil la sal an sla coa...), a-i è 'l reoplan fàit con ij panòt ëd melia, a-i è 'l castel ëd carton, che magara a stèila nen (coma a l'avrìa dit Barba Tòne Bodrìe), ma a fa soa bela figura, a-i è 'l carëtin con le roe 'd bòsch, a-i è 'l trator con ël bion ëd malëzzo, a-i è 'l trenin con la botala, a-i son le bote travestìe da fàula, a-i son le cosse veuide ch'a son-o come 'd sonàj, a-i son ij giari, le bisse, ij pess, le lumasse ch'a fan un bestiare fantastich dij pìi fantasios, tut pijà da le radiss e da 'd materiàj dë scart (mai campé via gnente). Na bela manera, a dila tuta, për passé n'orëtta 'd nostalgìa (tutun, sensa gnun-e vërgógne, a basterìa). Ma nen mach lòn përché - sensa fé tròp ij moralista, neh - le masnà (visita guida per ij cit dle scòle) a pudran rasoné sle ciarafiëtte 'd na vota con profit. Sa mostra sì a dis tante còse che ognidun a tirerà fora daspërchiel. Esse bon a fé e esse bon a fantasié con gnente - ant un temp tut spatuss e falbalà - a l'è na gran bela lession. Na lession ch'a paga 'l viage. ëd Giovanni Tesio - dal Vënner dla Stampa dël dël 25 ëd fërvé dël 2005 |
|
Indietro |