Quat autor an serca 'd na stagion neuva për ël teatro ch'a s'esprim an piemontèis

A l'é passàine d'eva sota ij pont da quand ch'as pudìa disse con bon-a rason che 'l teatro piemontèis a tirava ij caussèt. I soma bin ch'a basta nen na rondolin-a a fé na prima. Ma cola rondolin-a lì a na pòrta e a l'ha portane d'àutre. Fòra dël paragon, nen pòch dël mérit dla cita (esageroma nen) arnassita dël teatro 'n piemontèis a ven da la lege 26. An ël quàder ëd costa lege la Region Piemont a bandiss ël premi për n'euvra teatral ant le lenghe dël Piemont. N'inissiativa ch'a l'ha premià d'autor gnente mal. A fé quaich nòm, Bianca Dorato, Remigio Bertolino, Silvio Viberti, Oscar Barile, e bon ùltim, ma tut àut che da meno, Michele Bonavero, che l'an passà a l'é stàit premià për un test motobin pensos, "Coma un vol ëd farfalin-e", ch'a parla nen mach ëd bigat e 'd siviltà campagnin-a damentrè ch'a fa sò passagi vers la rivolussion industrial, ma 'dcò - e forse fin-a 'd pì - 'd tut lò ch'a l'é la vita ch'an gropa a la tèra e a nòsta caden-a d'òmo 'd radis. Për l'edission pen-a passà ij segnalà - se nen pròpe ij premià - a son stàit quat e ij sò test a son stàit publicà come sempe (cost sì a l'é lë scartari n° 8) ant un lìber dla Region Piemont (Assessorà a l'Identità) e dla Ca dë Studi Piemontèis (pp. 214, euro 12, për ciamelo basta fé na telefonà al nùmer 011/53.74.86). Quat nòm, quat titoj. D'Oscar Barile "La giòstra a pé 'nt ël cul", ëd Remigio Bertolino "La sposa dël tecc ross", d'Antonio Borghese "La ca dla rol", ëd Marco Gosso "Ciau pais". A son squasi tute euvre scrite 'nt la koinè. A fan ecession Remigi Bertolino che da sempe a scriv ant la parlada 'd Montaud 'd Mondvì e quàich frise ocitàne ant l'euvra 'd Gosso. A part sòn, a son stòrie sempie e polide. Stòrie 'd famije, cole 'd Barile e 'd Borghese, stòrie 'd povertà e 'd desolassion montagnin-a cola 'd Bertolino, stòria pì coral cola 'd Gosso. Bertolino a part, ch'a l'ha un mond ferm a soa misura (ùnica) 'd poesìa, ant tuti la veuja 'd bogé l'assion tra jer e 'ncheuj. Na manera për chërde che la vita a vira, che 'l teatro a deuv viré con chila. ëd Giovanni Tesio - dal Vënner dla Stampa dl'11 ëd fërvé dël 2005

Indietro