Da Venaria a Cantalùa, da Civass a Nissa Monfrà vintesinch piasse për vint companìe piemontèise

Vintesinch "piasse", da Biela a Cantalùa, da Civass a Moncalé, da Nissa Monfrà a Pinareul, Rossan-a, Venarìa e via parèj; vint Companìe për vint spetàcoj che da fërvé a magg a daran vos e còrp a la Rassegna 2005 dël "Teatro nelle lingue del Piemonte", soagnà da la Region Piemont, Assessorà a l'identità, e masentà da la Fondazione Circuito Teatrale del Piemonte (n'istitussionn mach nà da pòch e che a l'ha coma but ëd giuté la difusion dla coltura teatral e la formassion d'un pùblich neuv spantià su tut ël teritòri regional). Për costa Rassegna, ch'a fa sinch, la Region, a spiega l'Assessor a l'Identità Gipo Farassino, a l'é angagiasse motobin përché a l'é na manera 'd dé fijà, travers al teatro, a le tradission e a la lenga 'd nòsta tèra. Ant ël programa i trovoma ij clàssich, coma Garelli presentà dal Teatro Zeta, Alarni, ant un lìber adatament ëd Massimo Scaglione, Artuffo presentà dal Gruppo Teatro Carmagnola; d'àutor neuv (segnalasse aj premi teatraj nelle Lingue del Piemonte sempe dla Region) coma Michele Bonavero, portà an sena dal Teatro delle Dieci, Oscar Barile, con ël Teatro 'd Sinio e Vittorio Sivera, con la Companìa Teatro Serenissimo 'd Cambian; opura ancora ij Musicant ëd Riva 'd Cher, speriment coma col ëd Saccomandi o dle sorele Suburbe, 'l Gruppo Teatro Angrogna, Giorgio Molino e d'àutr ancora ch'i segnaleroma vira për vira. Ël cost dël bièt për ogni spetàcol a l'é 'd sinch euro, e as peul piesse ant ij Teatro n'ora prima. Për avèj 'l programa complet e anformassion as peul ciamesse a la Fondassion (via Cesare Battisti 2, a Turin) opurament a basta telefoné al nùmer 011/518.59.33 (nùmer ëd fax 011/518.71.51). Prossim randevò: saba 5 ëd fërvé a neuv ore 'd sèira al Piccolo Teatro Perempruner ëd Grujasch con ij Volti Anonimi ch'a presento la comedia "Genesio Battaglino professore di violino" 'd Roda; màrtes 8 al Teatro Matteotti 'd Moncalé, lë spetàcol "Par 'n tòch 'd pan" ëd e con Daniele Conserva, ch'a sarà arpetù giòbia 10 al Teatro Officina 'd Coni. d'Albina Malerba - dal Vënner dla Stampa dël 4 ëd fërvé dël 2005

Indietro