Vintequat composission ant un lìber d'Antonio Tavella, poeta 'd Racunis

Tòni Tavela (për l'anagrafe Antonio Tavella) a l'é un poeta 'd Racunis ch'a l'ha publicà quaich tìtol con Chichin Paschëtta e con col magìster ch'a l'é stàit (për tanti) Barba Tòni Bodrìe. E la presensa 'd Barba Tòni, 'dcò ant cost ùltim lìber, "Pais dël Piemont" (pen-a publicà da "La Slòira" con tradussion e nòte dl'autor e le ilustrassion ëd Candida Rabbia, pp. 72, s.i.p.) as sent. Pa mach për l'ideja, ch'a l'é cola 'd canté Piemont, ma 'dcò për la manera, për ël ghëddo, për ël vers coma l'é batù. Un vers long, bastansa ràir ant la poesìa piemontèisa. Un vers ch'a l'ha damanca dë spantiesse, ch'a pija na disposission ritmica larga e fin-a 'n pò prosàstica, ma ch'a l'é bin degordì e s-cet, Còsta a l'avrìa dit coma 'l vin dla doja piemontèisa: franch e sincer. A dis bin Censin Pich ant l'achit: "Coste vintequat composission a son ël frut ëd l'ambission ëd presenté 'n mosàich pì che grand con le tèssere dij vàire pòst ëd nòstra tèra: un-a dle pì sgnore d'aveniment e 'd nuanse 'd minca géner, con tut che marcà da n'unità coltural ancreusa causà da soa geografìa e da le vicende singolar ëd soa stòria". As va da Alpëtte a Alfian, da Ala dë Stura a Alpignan, da Angreugna a l'Agògna, da Andòrn Mica a l'Argëntera, da Cherasch a Arbeuri, da Alban a Aussan Scrivia. Tut Piemont ant un-a geografia ch'as fà stòria (ma as pudrìa disse dla stòria ch'as fa geografia): l'un-a anvërtojà ant l'àutra, la sconda ampastà con la prima, e tute doe a fé caden-a e ant un-a paròla sola: religion. L'eve "dl'Eva Dòr", l'onde 'd "Pare Eridan", la Dòira e Alpignan, La Marsaja, tamburin e rataplan, Ala, Céres, Cheuri e la speransa dël doman ch'as gropa a la cossiensa 'd na stòria sensa blaga ma pien-a d'ardiman. Pì che rime, ritm. Pì che melodìe, canson batùe a pass dësgagià. A resta fin-a difìcil sité quaich vers separà da j'àutri. Sì a-i é dabon n'unità d'intendiment e d'emossion ch'a fa "rassa". Mistà ch'a fisso na passion përfonda. Tèra e poesìa ch'a canto. ëd Giovanni Tesio - dal Vënner dla Stampa dël 28 ëd gené dël 2005

Indietro