Na vijà ch'a va dal Calvo a Bianca Dorato a l'ansëgna dle pì bele vos piemontèise

St'agn sì l'apontament vorsù e sostnù da la Region Piemont (Assessorà a l'Identità) e organisà da la Ca dë Studi Piemontèis, a l'é për lun-es 20 dë dzèmber a eut e mesa 'd sèira, al Teatro Carignan. La bombonera ch'a l'ha inaugurà set agn fa la bela costuma, a torna fé da stabe ideal. Në stabe ch'a l'é pì nen col dle vijà paisan-e 'd Gelindo pastor, ma tutun un pòst ch'an gropa a la caden-a dle memorie e dla tradission. A l'é 'l sétim Natal che foma ansema. A l'é 'l sétim Natal che le pì bele vos piemontèise a diso për noi 'l son dla speransa dël Bambin. A giuta tuti, chi ch'a cred e chi nò, pensé che cambié as peul, as deuv. E sicome la poesìa, pòch o tant, an cambia sempe, a l'é nen stàita n'ideja da gnente sërché n'ocasion për sté ansema e fesse traversé dai ragg che mach la poesìa a sa fé luse coma 'n sol an mes a le nebie pì spësse. A l'é nen na question ëd sente mach le vos ëd Natal. A l'é question ëd trovesse a Natal për sente le vos piemontèise pì nostran-e. Sensa esclude gnun, as trata ëd fesse pì visin për sentisse òmo 'd tute part. E për fé sòn gnente 'd pì bel, st'agn, ch'a l'é l'agn dlë scond sentenari dla mòrt dël médich giacobin Edoardo Ignazio Calvo, d'ancaminé propi da chiel. E con la soa la vos ëd tanti d'àutri: Costa, Pacòt (për arcordé ij 40 ani da la mòrt), Brero, Barbafiòre, Aldo Barberis, Bianca Dorato, Clivio con na filastròcola për le masnà (ant l'ocasion a-i sarà 'dcò la premiassion dël premi teatral për un test ant le lenghe dël Piemont, doa ch'a son stàit segnalà Oscar Barile, Remigio Bertolino, Antonio Borghese e Marco Grosso). Passagi bin obligà për intré - con ël final riservà al "Natal" ëd Renzo Gandolfo - ant ël cheur d'un segret luminos ch'a saran j'ator soagnà da la regìa 'd Massimo Scaglione a fene sente: Rosalba Bongiovanni, Mario Brusa, Aldo Delaude, Vittoria Lottero, Fulvia Roggero, Marco Voerzio, compagnà dal flaut dë Stefano Deotto e da la chitara 'd Claudio Tarditi. Na promëssa 'd poesìa për na caban-a 'd sentiment ch'a ven-o - come la stèila - dal creus dël temp dij temp. ëd Giovanni Tesio - dal Vënner dla Stampa dël 17 dë Dzèmber dël 2004

Indietro