Tre ante d'un travaj ch'a lassa soe pianà passand për mùsica, fàule, conte, poesìa.

Piemont ch'a bogia: dabon a l'é un fërmiolé d'inissiative e 'd travaj për goerné lenga e coltura 'd nòsta tèra ch'a marco na vitalità e na veuja fòrta 'd testimoniansa. An fa piasì segnalene tre ch'an ven-o da vaire part dël teritòri e che a riguardo la mùsica, la pròsa e la poesìa. "Pietro Micca a dventerà n'eròe e Turin a lo ricorderà ... L'era partì da sò pais për fé 'l soldà e combate ij fransèis / a lo ciamavo Passapërtut ...": a son ij vers dla "Ballata di Pietro Micca" un-a dle des balade d'un Cd "Piemonte blues" d'Ezio Girardi. Girardi, ch'a firma tuti ij test e le musiche dle balade, e che a l'é 'dcò editor dël Cd (tel. 011/967.85.23) a l'é nen neuv an cost géner. A l'é bin conossù coma sonador dla viòla dij bòrgno, ma an costi ani a l'ha travajà sla mùsica piemontèisa, sia con atension al repertòri tradissional ch'a l'ha cujì ant ël "Nuovo canzoniere piemontese" (Associazione Amici della Cultura Piemontese, 2004), sia sercand neuve stra e na neuva identità për la mùsica e la canson piemontèisa con ël but d'arnové e slarghé 'l patrimòni musical dël Piemont. Un bel scartari soagnà da Censin Pich a cheuj na sernia 'd conte, fàule e legende premià ant j'ùltimi des ani dël concors "Sità 'd Canèj" (Edission Sità 'd Canèj, Assessorà a la Coltura, pp. 83): as peulo les-se con un bel pëssion ëd pròse 'd Remo Bertodatti e 'dcò 'd Virginio Ilotti (1925-1993), na conta 'd Tavio Còsio (1923-1989) e un-a 'd Silvio Martina. "Carù porta dla Langa" a l'é un Concors ëd poesìa e pròsa che a festegia con l'edission 2004 ij trantetré ani 'd presensa. Na plachëtta, soagnà dal "Corriere di Carrù" e dedicà a la memòria dël prof. Alessandro Francesco Fia, a në smon la racòlta dl'edission 2004. Un bochèt 'd bej nòm ëd poeta con na squadra bin fosonanta 'd nòm feminin. Da segnalé la poesia "Giassé" 'd Bianca Dorato: "Stagion e agn / a visé vers la mira / ëd tanti pass / I sai bin la fatiga / I sai bin ël dolor". Tre ante d'un travaj ch'a marcia, ma ch'a lassa soe pianà. d'Albina Malerba - dal Vënner dla Stampa dël 26 ëd novémber dël 2004

Indietro