Le colession sientìfiche dl'Università ant le sale dl'Archivi dë Stat ëd Turin.

Magara nen tan an piemontèis, ma 'd piemontèis motobin. A së s-ciama "La memoria della scienza" e a l'é na mostra ch'a fa da vetrin-a - da giojera a l'avrìo dit na vòta - a tut lò che a propòsit dë siensa a conservo e a cudisso le colession sientìfiche dl'Università 'd Turin. As ten për arcordé 'l sest sentenari 'd nòsta Università ant le sale dl'Archivi dë Stat an piassëtta Mollino (a dura fin-a al 30 'd November) e a l'é soagnà da Dario Cantino, Michela Di Macco, Giacomo Giacobini e Giovanni Romano. Quasi tërsent agn ch'a passo sota ij nòsti euj a travers lë studi dle bestie, dël còrp uman, dla tèra, dij mineraj, sensa conté - nen sensa baravantanerìa - atrass e utiss e trovaje 'd Lombroso e 'd soa scòla ch'a l'ha marcià bin spedìa drinta e fòra 'd ca. Na bela sèrnia dë strument ch'a gropo i savèj sientìfich e umanìstich e artìstich ant un bocc ëd sugeriment e 'd sugestion. A s'anandia tra Ses e Setsent, as moltìplica tra Set e Eutsent (coma fé a dësmentié che un dij nòst poeta pì robust, Edoardo Ignazio Calvo, sentenare ant un sentenare, a l'era médich al San Gioann e a l'avìja 'l ponson dl'arserca?), a pija l'andi pì che tut ant la sconda metà dl'Eutsent e a continua ant ël Neuvsent fasend ëd nòsta sità na sità d'ingegné ('l Poli a nass ant ël 1906, anche se prima a l'é mnuje Galileo Ferraris). Na stòria bela ch'a fa piasì contela e ch'a s'antërsa con ël Risorgiment (ant ël 1840 a Turin as ten lë scond congress ëd ij siensià italian e la còsa a buta le forse dl'ordin an quàich antrap). Na stòria ch'a-j dà a nòsta stòria un ghëddo tut particolar. Pensoma a 'd përson-e coma l'idràulich Bidone, ch'a l'ha faje da maestro a Massimo d'Azeglio, pensoma a n'òm come Primo Levi che da la chìmica a l'ha pijà ij fondamentaj 'd soa manera 'd sente. Ma podrìo pensé a sent àutre përson-e. S'a l'é vera che tra istitussion e vocassion, a son le përson-e ch'a fan la diferensa. La mostra dl'archivi a l'é na bon-a ocasion për penseje 'n pò 'nsima. ëd Giovanni Tesio - dal Vënner dla Stampa dël 5 ëd novémber dël 2004

Indietro