Un Cd ëd canson da canté e 'd poesìe da dì për n'omage dla Gerla al poeta dla Consolà.

Con an covertin-a la bela faciada dla Consolà, 'l Coro La Gerla 'd Turin a në smon un Cd dij pì originaj. A s'antitola "Omaggio al poeta Nino Costa" (www.corolagerla.it; basta telefoné al nùmer 011/36.38.08). A cheuj ansema dissèt canson dla tradission, da "Maria Gioana" a "La Violeta", da "Nineta" a "La pastora fedele"; da "Montagne dël mè Piemont" a "Il canto delle mondine" cantà dal Coro La Gerla, sota la diression ëd Roberto Bertaina, e a-j compagna da disdeut poesìe 'd Nino Costa (28 giugn 1886 - 5 novèmber 1945) dite da Celestina Costa, che coma tuti a san a l'é la fija 'd nòst grand poeta. Celestina da pì 'd mes sécol, ansema a la Ca editris Viglongo, che 'd Costa a l'ha publicà tuta l'euvra, a pòrta anans con cheur e passion l'arcòrd e la memòria dël pare-poeta: a l'é stàita sempre soa vos an tante e tante manifestassion, vijà, recite; e adess che Celestina a l'ha rairì soe presense, sente le paròle 'd "La copà", o "La camisin-a", "Rassa nostran-a" o "Nìvole", "Mare Granda" o "La Consolà", sislà sël reu candi d'un bel Cd a l'é na ròba ch'an dà un frisson e a fà dabon gòj. Ël Coro La Gerla, che dal 1982 a pòrta an gir, e nen mach an Piemont, ma 'dcò an Fransa, Spagna, Almagna, Inghiltèra e an tanti àutri pais, la vos dla tèra piemontèisa (për sò angagi a l'é vagnasse dël 1992 'l Sigil d'Argent dla Sità 'd Turin), a podìa nen serne manera pì bela për fé n'omagi a chi 'd costa nòsta sità e costa nòsta tèra a l'é stàit ël cantor pì popolar e pì dàusin al cheur dla gent. A compagna 'l Cd na plachëtta, che oltra a le neuve sl'atività e e ij protagonista 'd La Gerla, a l'ha na cita biografìa 'd Nino Costa e 'd Celestina e ij test dle canson; mentre për le poesìe a armanda a le edission Viglongo, e a pòrta mach "La Consolà". Sensa spatuss ël Coro La Gerla a l'ha realisà un contribù amportant për la conossensa 'd Nino Costa e 'd soa poesìa, për na cossiensa 'd nòsta identità 'd piemontèis. I l'oma maitass ëd podèj sente Còro e Celestina Costa ant un-a presentassion ch'a l'é an vista ant la Cesa dla Consolà. d'Albina Malerba - dal Vënner dla Stampa dël 29 d'otóber dël 2004

Indietro