Aldo Barberis e Montàud Scarampi ant un lìber publicà da la Ca dë Studi.

"Mi l'hai un pais, sle colin-e astesan-e, cassin-a dzora 'n brich, 'nté l'é nassù mè pà ... Mi i l'hai un pais dij mè ani masnà". Un pais a-i veul a disìa Pavese, e Aldo Barberis al l'ha bin piantà ant ël cheur: a l'é Montàud Scarampi, "pais an crësta dla colin-a, tuta na vigna an sij doi versant, con prà e camp ëd melia 'n fond dle vaj". A cost pais Barberis a dedica na bela racòlta 'd poesìe "Colin-e astesan-e d'antan. Arcòrd ëd vita Montaudèisa. Conte an vers e 'n rima". Publicà na prima vòlta për sò soen da l'Artistica 'd Savian ant ël 1996, 'l lìber a torna adess ant n'edission fòra colan-a dla Ca dë Studi Piemontèis (pp. 70, euro 6), ch'a ven a fé cobia con n'àutr sò lìber ëd poesìe surtì për la Ca dë Studi dël 1998, "L'ùltima reusa". Aldo Barberis a l'é n'òm ch'a l'ha dedicà tuta soa vita al travaj, 'n "manager" as dirìa ancheuj, ma quand a son rivà j'ani dla pension e dël temp lìber a l'ha podù slarghé sò cheur e ij sò pensé a soe passion goernà s-ciasse drinta 'd chiel: la poesìa e la pròsa an piemontèis, e 'l disegn e la pitura (sò a son ëdcò ij disegn a matita ch'a soagno l'euvra). Adess ch'a l'ha tajà an piòta e arbiciolù 'l fil dij novant'ani, cost bochèt ch'an regala a l'é nen mach n'euvra 'd poesìa, d'arcòrd, ëd nostalgìa, ma a son pagine ch'a l'han ëdcò 'n valor ëd docomentassion etnografica. Profij 'd "tipo" ëd pais (Giusep dël Pinton, La Bocalin-a), pòst (Val d'Anresi, la stra dla Plëtta), tradission ëd cusin-a (Ij cisi, Polenta e lapin, Bagna càuda për na vigilia), mësté (Bate 'l gran, Dësfojé la melia, Vëndëmia ...), feste (La giòstra 'd San Ponsian, Canté 'l magg, Canté j'euv), manere 'd vive che la poesìa a fissa e a cudiss për le neuve generassion. Ròbe che miraco gnun lìber dë stòria a arcorderà mai, 'd sicur a na scrivrà mai con l'afet e 'l deuit e l'amor ch'as sento ant ij vers d'Aldo Barberis. A son paròle d'un temp masnà - d'un temp mignin - fërmasse ant j'euj e ant ël cheur d'un galantòm piemontèis. d'Albina Malerba - dal Vënner dla Stampa dël 15 d'otóber dël 2004

Indietro