La vos viton-a 'd na poesìa ch'a trocion-a nen a canta con alegrìa sarvan e faunèt dla Varàita.

A son tòst sich agn ch'a l'é mancaje Barba Tòni Bodrìe e a l'é bel arcordelo sì come n'òm ch'a l'avìa 'l gust e 'l sust dla coerensa . Për chiel ël vej adasi latin (Amicus Plato sed magis amica veritas") a valìa cheicòs. Amis ëd tùit ma pì 'ncora dla verità. Amis, pì che 'd tut, dla poesìa, che a cudìa con la passion d'un armita ch'a savìa calé giù daj bric come 'n viton. Na passion veja s'a l'é vera ch'a l'era laureasse con na tesi su Silvio Balbis, un dij salussèis dl'inissi dl'Eutsent ch'a l'era stàit amis d'Onorato Pellico, 'l pare 'd Silvio Pellico. Soa poesìa a l'é cudìa con le pere dla Varaita e a canta la natura, ij faunet, i sarvan, le fràule-fròle piemontèise, ij castej ch'a stèilo, le ròce ch'a fan da cun-a e a fan da camposanto, ch'a gropo la vita e la mòrt: la mòrt ch'a dà la vita, la vita ch'as sara - mach për durvisse - ant la mòrt. Sò mond a l'era 'n mond ëd religion ant un mond che 'd religion a veul gnanca sentine parlé: religion ch'a gropa inteligensa e sentiment, religion ch'a gropa ij pare aj fieuj, religion dla natura e dla tradission, religion ch'a parla d'angej e 'd Nosgnor. Soa lenga a l'era rica coma sò vocabolari ch'a cuija doa ch'a j'ësmijava, ch'a messonava tra valade e pian-a, tra le parlade dij pastor e dij mesté, dij lìber ch'a lesìa e dle vite ch'a vivìa. A l'era passà da na poesìa tuta natural a na poesìa tuta spiritual. Ma soa manera 'd vive lë spìrit a l'avìa gnente 'd mòl, a l'era drua e fërma come na rol, come un malëso 'd soe part. A l'era n'òm ëd coltura e 'd leture. A l'era stàit diretor dla biblioteca 'd Salusse, a l'avìa mostà stòria dl'art ant le scòle. A l'era n'òm ativ, a l'avìa fondà 'l Moviment Autonomista Ocitan, peuj a l'era passà al Piemont Autonomista e a l'avìa finì 'd fé 'l consié regional për la Lega. Pì che tut poeta, a l'é vivù ant l'ambossor ëd soa val pòvra e benedìa, dovrand le paròle come 'n giogador ch'a trocion-a nen e ch'a-j basta pòch për fé sò gieugh ch'a l'é franch nen da pòch. Për noi Barba Tòni a l'é la poesìa dij sò lìber pì bej. Coj ch'a parlo e arson-o con l'alegrìa dle sìlabe e dij nòm. ëd Giovanni Tesio - dal Vënner dla Stampa dl'8 d'Otóber dël 2004

Indietro