Farassino a l'ha firmà doi protocòj d'intèisa con la Diression dl'Ufissi Scolàstich Regional.

Na data stòrica. Parèj a l'ha difinila l'Assessor Regional a l'Identità Gipo Farassino. E chi a l'ha a cheur l'avnì dla lenga e dla coltura piemontèisa a peul bin sotlignelo. As trata dla firma 'd doi protocòj d'intèisa firmà tra la Region Piemont e la Diression General për l'Ufissi Scolàstich Regional (Miur): un për "la realizzazione di progetti, percorsi ed attività per l'arricchimento dell'offerta formativa del sistema scolastico del Piemonte" ch'a riguarda lë studi dla lenga, dla cultura e dle tradission piemontèise; e l'àutr për l'istitussion dl'"elenco regionale degli insegnanti di storia, cultura e lingue piemontese, occitana, walser e franco provenzale". A son na bela partìa d'ani che la Region, mersì a l'angage dle Associassion Colturaj, a travaja ant le scòle për ij Cors d'agiornament për j'insegnant, e 'dcò con le masnà (con ëd risultà dabon ancoragiant e che prest a saran mostrà al pùblich ant n'esposission dij travaj realisà an costi ani dai cit), ma l'intèisa ufissial a formalisa ij proget, gavandje da la casualità e da la bon-a volontà, e a impegna diretament l'istitussion scolàstica, che fin-a adess a l'era restà an sla broa. Ël piemontèis a scòla da adess a l'é pì nen ël balin ëd nostàlgich dël temp passà (a l'é mai stalo për la vrità, se nen ant la testa dij sòlit bin-malpensant), ma a dventa un-a dle propòste amportante ant la formassion dle person-e. Miraco a smija da bon la realisassion d'un seugn. Ma a venta sté a l'avàit përchè le bon-e intension a resto nen mach paròle scrite su 'd papé ciapa pòver. La tension moral e la ciàira convinsion che cost travaj ant le scòle nen mach a dësrangia gnun, ma a l'é un moment amportant ant ël dësvlup dl'inteligensa e dl'overtura dij cit, ch'a son stàit ël drapò 'd coj tant che bele ant ij temp scur a l'han mai molà 'd chërde e 'd fé, a l'han durbì 'l sorgh për che ancheuj as peussa (tròp tard?, i l'oma pròpi fiusa 'd nò) marcé sicur su costa stra. Për ël piemontèis e për j'àutre lenghe minoritarie dla region a l'é dabon na bon-a neuva. d'Albina Malerba - dal Vënner dla Stampa dël 1 d'otóber dël 2004

Indietro