Na neuva sernìa 'd literatura 'n piemontèis për chi a sa gnente 'd pianta dij nòsti scritor.

L'Associassion Coltural Nòste Rèis a l'é bin conossùa ant ël panorama dij sodalissi ch'a son angagià për la tùa e la valorisassion dla lenga e dla leteratura piemontèisa, pì che tut përchè a travaja motobin ant le scòle e 'dcò për ij cors ch'a fa a Turin, ant le Circoscrission, e 'dcò 'n pòch ant tuta la region. Da ràir a publica 'd lìber, che tutun a ten-o sò pòst ant l'editorìa local. A l'é 'l cas dël volum ëd Michela Grosso (che 'd Nòste Rèis a l'é un dij pivò), surtì a l'Ansëgna dla Provincia 'd Turin, "Alla ricerca delle nostre radici. Incontro attraverso i secoli con i principali autori della letteratura piemontese". Coma a scriv l'autris ant la pàgina d'overtura adressà aj letor, ël lìber a veul nen esse n'euvra 'd crìtica leteraria, ma a veul dé na man a fé conosse jë scritor pì amportant dla stòria 'd nòsta leteratura regional. Për cost travaj Michela Grosso (che 'n paira d'ani fà a l'ha 'dcò publicà na "Gramàtica piemontèisa") a l'ha fàit profit dij tanti ani ch'a l'ha mostà piemontèis ant le scòle. Donca un test divulgativ che, sécol për sécol, a smon d'autor, con nòte bibliogràfiche an italian, e na cita sernìa 'd poesie o 'd pròse (con un glossari per le paròle pì dificile). La "spasgiada" a part, coma a l'é tradission, dai "Sermon Subalpin", a passa për ël Ventura Cartiermetre, Calvo, Brofferio, Rosa e via fòrt, val a dì ij clàssich e anviron, e a riva a Arrigo Frusta, Giovanni Gianotti, Nino Costa, Oreste Gallina, Pinin Pacòt, fin-a aj nòm pì davsin a noi 'd Camillo Brero, Tavo Burat, Bianca Dorato, Censin Pich, e tanti d'àutri. Un bochèt ëd na senten-a d'autor. Pagine 'd na leteratura ch'a venta conosse 'd pì, ant la fiusa che nòsta gent a l'ha j'energìe per ten-e vive soe tradission. Coma a scrivìa Nino Costa "Gnun-e tëmme ch'i së sperdo. Quand che ij pare a stago ciuto s'ancamin-o ij nòstri fieuj." E costa a l'é la convinsion 'd Michelina Grosso: le paròle, le còse, la gent ch'a l'ha nen un passà, a l'é mal fé ch'a l'abio n'avnì. Ij piemontèis a l'han un tesòr e tut lòn ch'as fà për goernelo a l'é bin vnù. d'Albina Malerba - dal Vënner dla Stampa dël 17 dë stémber dël 2004

Indietro