Na bela sernìa dla literatura 'n piemontèis publicà da la Region Piemont e Ca dë Studi.

Apress dël "Profilo di storia della letteratura in piemontese" ëd Clivio (2002) e "La letteratura in piemontese dalle Origini al Settecento" (soagnà da Giuliano Gasca Queirazza, Gianrenzo P. Clivio e Dario Pasero, 2003), al ritm precis dël contator dla ròla, a l'é surtìe adess ël ters volum "La letteratura in piemontese. Dalla Stagione Giacobina alla fine dell'Ottocento" 'd Gianrenzo P. Clivio e Dario Pasero (Turin, edission Region Piemont-Ca dë Studi Piemontèis, 2004, pp. 650, euro 30). Coma as capiss bin dal tìtol an cost volum (cifrà da na soasìa covertin-a dël pitor Francesco Tabusso, mentre ij primi doi a l'ero vestì da Ettore Fico e Francesco Franco) as treuva la sernìa antologica ëd pròse e poesìe ch'a van dal gran poeta civil Edoardo Ignazio Calvo (st'agn a segna ij dosent da la mòrt), ai doi poeta pivò 'd nòst Risorgiment, Angelo Brofferio e Norberto Rosa, fin-a an broa dl Neuvsent con Alberto Viriglio, Oreste Fasolo, Alfonso Ferrero, Amilcare Solferini, cola ch'a ven dita la generassion d'antorn al "Birichin"; passand për na coalera dë scritor miraco meno conossù, ma ch'a son l'ossadura 'd nòsta leteratura e che a rapresento tut ël Piemont. Basta pensé aj nòm ëd Carlo Casalis, Agostino Bosco, Giovanni Ignazio Pansoja, Giacinto Buniva, Enrico Bussolino, Cesare di Saluzzo, Cesare Balbo; a jë scritor ëd nòst teatro coma Federico Garelli, Vittorio Bersezio, Luigi Pietracqua, Mario Leoni e via dëscorend. Ma i trovomo 'dcò Massimo d'Azeglio con col sò fiamengh "Salòt dla Marchèisa ëd Chërsentin"; San Giovanni Bòsco con "Giandoja e sò codin" e "Ij dësbaucc"; Giovanni Faldella con "Un bacan spiritual" e Carolina Invernizio con në s-cianchèt dij "delit ëd na bela fija". An tut 54 autor, për minca na cita nòta bibliogràfica, e pì che 170 test, tuti con tradussion italian-a a pé pàgina. N'euvra ch'a buta a l'onor dël mond nòst patrimòni 'd lenga e 'd leteratura e che, con j'àutre doe (e con l'ùltim volum ch'a l'é an cantié), a duvrìa non manché ant le biblioteche dël Piemont e ant le ca dij piemontèis. d'Albina Malerba - dal Vënner dla Stampa dël 10 dë stémber dël 2004

Indietro