Gnun riferiment a le lenghe e parlade dël Piemont. Na manera d'arnié lò che l'Euròpa a l'ha arconossù.

I l'oma sotman lë sbòss dlë Statut dla Region Piemont, test aprovà 'l 5 ëd mars 2004 da la Comission Special për lë Statut dël Consèj Regional dël Piemont, da sotpon-e a le Consoltassion: lòn ch'a veul dì che a andrà an Consèj përchè tute le fòrse polìtiche a na pijo vision e a peusso fé soe considerassion e, a-i é da avèj fiusa, fé 'd coression. A son sent artìcoj ch'a dovrìo esse le fondamente 'd nòsta Region për goernene e goerné 'l passà, 'l present e l'avnì 'd nòsta tèra. Lòn che noi a në sta pì a cheur a l'é scrit a l'artìcol 7, "Patrimonio culturale", e a dis parèj: "La Regione tutela e valorizza le radici storiche, culturali, artistiche e linguistiche del Piemonte e, in particolare, salvaguarda l'identità della comunità secondo la storia, le tradizioni e la cultura." E sòn a va bin. Peui al punt 2 a dis: "La Regione Piemonte tutela le minoranze linguistiche, culturali e religiose nel rispetto delle diversità". E belessì a në smija che le ròbe a vado meno bin. Prima 'd tut buté ansema le minoranse religiose con cole lenghìstiche a l'é nen na ròba ch'a sia pròpe filològica. Ma lòn ch'a va nen a l'é ch'as fa gnun riferiment a la lenga piemontèisa, a soe variante locaj e a j'àutre lenghe ch'as parlo ant la Region. E-lo che ij Consié a l'han por ëd dì an manera ciàira lòn che fin-a l'Euròpa a l'ha arconossù? Con che facia androma a confrontesse con j'àutre region europenghe s'i l'oma gnanca 'l corage 'd dì sensa gena cole ch'a son le lenghe ch'as parlo a ca nòsta? Rispet për tuti e për tut a veul nen dì arneghé lòn ch'i soma stàit e lòn ch'i soma. E la lenga a l'é un pivò për l'identità 'd na gent.. Përché arnié un patrimòni 'd coltura; a chi a peul feje 'd mal, se ancheuj a lo sa fin-a ij givo che pì lenghe un a parla o a conòss pì a l'é lìber e duvert a le diversità. A më smija 'd lese tute le gavade cha son scrivusse e fasse quand che as tratava 'd dé un drapò a la Region. Piemontèis pensom-je bin ansima e foma sente a j'aministrator, tuti e 'd tuti ij color polìtich, nòsta vos! d'Albina Malerba - dal Vënner dla Stampa dël 2 ëd luj dël 2004

Indietro